Kikosi cha Simba vs KMC Leo 30/06/2026: Habari za Timu, Muda na Hesabu za Ubingwa
Wekundu wa Msimbazi, Simba SC, leo watakuwa dimbani kuusaka ubingwa mbele ya KMC FC katika mchezo wenye uzito mkubwa na unaoweza kuamua bingwa wa msimu wa 2025/2026 wa Ligi Kuu ya NBC. Mchezo huo utapigwa leo Jumanne, Juni 30, 2026, saa 10:00 jioni katika Uwanja wa KMC Complex, Dar es Salaam.
Simba inaingia kwenye mchezo huu ikijua wazi kuwa ushindi ndiyo njia pekee ya kuendelea kubaki kwenye hesabu za ubingwa. Baada ya mechi 29, Simba ipo nafasi ya pili ikiwa na pointi 70, nyuma ya Yanga inayoongoza msimamo kwa pointi 72.
| Taarifa | Maelezo |
| Mechi | Simba SC vs KMC FC |
| Tarehe | Jumanne, Juni 30, 2026 |
| Muda | Saa 10:00 jioni |
| Uwanja | KMC Complex, Dar es Salaam |
| Mashindano | Ligi Kuu Bara 2025/2026 |
Hiki Apa Kikosi cha Simba Leo Dhidi ya KMC
- Abel – 28
- Kapombe (C) – 12
- Bashiri – 63
- Vedastus – 4
- Mbegu – 60
- Semfuko – 37
- Morice – 18
- Kante – 8
- Baraka – 11
- Inno – 10
- Mwalimu – 40
Benchi / Subs: Kassali, Duchu, Mligo, Toure, Kadima, Gufye, Neo, Mpanzu, Chama, Dura.
Mchezo huu si wa kuingia kwa mahesabu ya kubahatisha. Simba inahitaji kushinda dhidi ya KMC kwanza, kisha kusubiri matokeo ya Yanga dhidi ya JKT Tanzania katika Uwanja wa Meja Jenerali Isamuhyo, Dar es Salaam.
Hesabu za ubingwa ziko wazi. Yanga ikishinda, itatwaa ubingwa wa tano mfululizo. Sare pia inaweza kuitosha kulingana na tofauti ya pointi iliyonayo. Kwa Simba, hakuna chaguo jingine zaidi ya kushinda KMC na kusubiri kinachotokea Mbweni.
Ndiyo maana kikosi kitakachopelekwa uwanjani na Simba leo kinabeba uzito mkubwa. Huu ni mchezo ambao makosa madogo yanaweza kubadilisha msimu mzima, hasa kwa timu inayohitaji pointi tatu na taarifa nzuri kutoka mchezo mwingine wa ubingwa.
Beki wa Simba, Shomari Kapombe, amesema lengo lao ni kumaliza msimu kwa ushindi na kuwapa furaha mashabiki ambao wamekuwa pamoja na timu tangu mwanzo.
“Lengo letu ni kupata pointi tatu katika mchezo wa mwisho na kuwafurahisha mashabiki wetu ambao wamekuwa nasi tangu mwanzo wa msimu. Tunawaomba wajitokeze kwa wingi kwa sababu wao ni mchezaji wetu wa 12,” amesema Kapombe.
Kapombe pia amepongeza usajili uliofanyika dirisha dogo, akisema wachezaji wapya wameongeza nguvu kubwa ndani ya kikosi na kutoa mchango muhimu katika mafanikio ya timu msimu huu.
Kwa kauli hiyo, Simba inaonekana kuingia kwenye mchezo wa mwisho ikiwa na imani na nguvu ya kikosi chake. Hata hivyo, presha ya mwisho wa msimu inahitaji utulivu mkubwa, hasa kwa sababu macho ya mashabiki yatakuwa yakifuatilia kila kinachoendelea KMC Complex na Mbweni.
Kocha Msaidizi wa Simba, Seleman Matola, amesema mchezo dhidi ya KMC hautakuwa mwepesi licha ya wapinzani wao kuwa tayari wamepoteza nafasi ya kubaki Ligi Kuu Bara. Kwa mujibu wake, wachezaji wa KMC bado wana sababu ya kupambana uwanjani.
“Kushuka daraja ni kwa timu, si kwa wachezaji. Kila mmoja atapambana kuonyesha uwezo wake, hivyo tunatarajia mchezo mgumu lakini sisi tunahitaji pointi tatu,” amesema Matola.
Kauli ya Matola inaongeza picha ya aina ya mchezo unaotarajiwa KMC Complex. KMC inaweza kuwa tayari imeshuka daraja, lakini wachezaji wake bado wana nafasi ya kuonyesha uwezo wao, kujitangaza na kumaliza msimu kwa heshima.
Kwa upande wa KMC, kocha Iman Mwalupetelo amesema wachezaji wake bado wana sababu ya kupambana licha ya kushuka daraja. Mchezaji Jammy Simba ameeleza kuwa timu imepitia kipindi kigumu na sasa italazimika kujipanga upya kwa ajili ya kurejea ikiwa na nguvu zaidi msimu ujao.
Mazingira hayo yanaifanya Simba kuhitaji kuanza mchezo kwa umakini mkubwa. KMC haitakuwa na presha ya kubaki ligi, lakini inaweza kucheza kwa uhuru zaidi, jambo linaloweza kuongeza ugumu kwa Simba inayobeba presha ya matokeo na matarajio ya mashabiki.
Raundi ya mwisho ya Ligi Kuu Bara msimu huu inapigwa kwa mechi zote nane kuanza kwa wakati mmoja. Hii ina maana hakuna timu itakayokuwa na nafasi ya kusubiri matokeo ya wengine kabla ya kuamua namna ya kucheza. Kila kitu kitaamuliwa ndani ya dakika 90.
Nahodha wa zamani wa Simba, Mussa Hassan Mgosi, amesema ligi imekuwa na ushindani mkubwa na amezipongeza Bodi ya Ligi Tanzania na TFF kwa kuifanya ligi kuwa bora na yenye mvuto hadi mwisho.
“Nawapongeza Bodi ya Ligi Tanzania na TFF zimefanya ligi iwe bora na yenye mvuto, ndiyo maana kila mtu anasubiri nani atakuwa bingwa pia timu zimezidiana pointi chache,” amesema Mgosi.
Beki wa zamani wa Yanga, Oscar Joshua, naye amesema mvuto wa ligi umebaki hadi mechi ya mwisho, ambapo ndipo itakapojulikana kati ya Yanga na Simba nani atakuwa bingwa, pamoja na timu zitakazoshuka au kucheza mtoano.
Mapendekezo ya Mhariri:
