Kundi la Yanga Klabu Bingwa Afrika 2026/2027: Wapinzani na Ratiba
YANGA imepangiwa kazi nzito katika hatua ya makundi ya Ligi ya Mabingwa Afrika msimu wa 2026/2027, baada ya droo kuwakutanisha Wanajangwani na vigogo watatu waliowahi kutwaa ubingwa wa Afrika.
Katika droo iliyofanyika Jumatano, Oktoba 28, 2026 jijini Cairo, Misri, Yanga imeangukia Kundi B pamoja na Zamalek ya Misri, MC Alger ya Algeria na Club Africain ya Tunisia.
Hili ni kundi linalobeba historia ya timu zenye uzoefu mkubwa katika mashindano ya Afrika, huku Yanga ikiwa na kumbukumbu tofauti dhidi ya kila mpinzani wake.
Zamalek imewahi kuitoa Yanga mara mbili katika mashindano ya Afrika, MC Alger iliinyima nafasi ya kucheza robo fainali msimu wa 2024/2025, wakati Club Africain iliondolewa na Wanajangwani katika Kombe la Shirikisho Afrika mwaka 2022.
Kwa hesabu hizo, Yanga inaingia kwenye kundi lenye ushindani mkubwa, lakini pia fursa ya kubadili historia dhidi ya wapinzani ambao imewahi kukutana nao.
Kundi la Yanga Klabu Bingwa Afrika 2026/2027
Kwa mujibu wa droo ya Shirikisho la Soka Afrika (CAF), Yanga itacheza katika Kundi B linaloundwa na timu nne kutoka Tanzania na mataifa matatu ya Afrika Kaskazini.
Timu zinazounda kundi hilo ni:
- Zamalek SC – Misri
- Young Africans (Yanga) – Tanzania
- MC Alger – Algeria
- Club Africain – Tunisia
Kila timu itacheza mechi sita, tatu nyumbani na tatu ugenini, huku timu mbili zitakazomaliza katika nafasi za juu zikifuzu robo fainali.
Zamalek, Yanga ina deni la miaka mingi
Miongoni mwa wapinzani wa Yanga katika kundi hilo ni Zamalek, moja ya klabu zenye mafanikio makubwa barani Afrika, ikiwa imetwaa ubingwa wa mashindano hayo mara tano.
Hii si mara ya kwanza kwa timu hizo kukutana, kwani zilishawahi kupambana katika mashindano ya Afrika mwaka 2000 na 2012, huku Zamalek ikiibuka mshindi katika nyakati zote mbili.
Mwaka 2000, Yanga ilikutana na Zamalek katika raundi ya kwanza ya Kombe la Washindi Afrika, ambapo ilitoka sare ya bao 1-1 nyumbani kabla ya kufungwa mabao 4-0 ugenini na kuondolewa kwa jumla ya mabao 5-1.
Timu hizo zilikutana tena mwaka 2012 katika raundi ya awali ya Ligi ya Mabingwa Afrika, safari hiyo Yanga ikiondolewa kwa jumla ya mabao 2-1.
Baada ya miaka 14, Wanajangwani wanapata nafasi nyingine ya kukutana na wababe hao wa Misri, safari hii katika hatua ya makundi.
Kwa Yanga, michezo hiyo miwili itakuwa muhimu katika kutafuta pointi, hasa ikizingatiwa kuwa Zamalek ina uzoefu mkubwa wa kushindana katika hatua za juu za mashindano ya Afrika.
MC Alger, kumbukumbu za msimu wa 2024/2025
Mpinzani mwingine wa Yanga ni MC Alger, ambayo ilichangia kuifanya timu hiyo ishindwe kufuzu robo fainali ya Ligi ya Mabingwa Afrika msimu wa 2024/2025.
Katika msimu huo, timu hizo zilipangwa Kundi A pamoja na Al Hilal ya Sudan na TP Mazembe ya DR Congo.
Yanga ilipoteza mchezo wa kwanza dhidi ya MC Alger kwa mabao 2-0 nchini Algeria, kabla ya kutoka sare ya bila kufungana katika mchezo wa marudiano uliochezwa Januari 18, 2025, kwenye Uwanja wa Benjamin Mkapa, Dar es Salaam.
Sare hiyo iliifanya Yanga kumaliza katika nafasi ya tatu ikiwa na pointi nane, nyuma ya MC Alger iliyokusanya pointi tisa na Al Hilal iliyomaliza kileleni kwa pointi 10.
Yanga ilihitaji ushindi katika mchezo huo wa mwisho ili kusonga mbele, lakini MC Alger ilifanikiwa kupata pointi iliyoihitaji na kutinga robo fainali.
Safari hii Wanajangwani wataanza kampeni yao ya makundi kwa kuikaribisha MC Alger, mchezo unaotarajiwa kuwa na umuhimu mkubwa kutokana na matokeo ya msimu uliopita.
Club Africain, Yanga ina kumbukumbu nzuri
Tofauti na Zamalek na MC Alger, Yanga ina rekodi nzuri dhidi ya Club Africain, ambayo ilifanikiwa kuiondoa katika hatua ya mchujo ya Kombe la Shirikisho Afrika msimu wa 2022/2023.
Katika mchezo wa kwanza uliochezwa Novemba 2, 2022, kwenye Uwanja wa Benjamin Mkapa, timu hizo zilitoka sare ya bila kufungana.
Yanga ilikwenda Tunisia kwa mchezo wa marudiano Novemba 9, 2022, na kupata ushindi wa bao 1-0 uliowapeleka Wanajangwani hatua ya makundi ya Kombe la Shirikisho Afrika.
Ushindi huo ulikuwa sehemu ya safari ya Yanga iliyofika hadi fainali ya mashindano hayo msimu huo, kabla ya kupoteza ubingwa dhidi ya USM Alger.
Hata hivyo, Club Africain si timu ya kubeza kutokana na historia yake ya soka la Afrika, ikiwa ilitwaa ubingwa wa klabu bingwa mwaka 1991.
Timu hiyo imefuzu makundi ya msimu huu baada ya kuiondoa TP Mazembe kwa jumla ya mabao 2-1 katika raundi ya pili ya mchujo.
Editor’s Picks:
