Makundi Ligi ya Mabingwa Africa 2026/2027

Makundi Ligi ya Mabingwa Africa 2026/2027

YANGA na Simba zimepangiwa kazi nzito katika hatua ya makundi ya Ligi ya Mabingwa Afrika msimu wa 2026/2027, baada ya droo iliyofanyika Jumatano, Oktoba 28, 2026, jijini Cairo, Misri, kuwakutanisha na baadhi ya vigogo wa soka barani Afrika.

Katika droo hiyo, Yanga imepangwa Kundi B pamoja na Zamalek ya Misri, MC Alger ya Algeria na Club Africain ya Tunisia, huku Simba ikiangukia Kundi C lenye RS Berkane ya Morocco, Orlando Pirates ya Afrika Kusini na Colombe Sportive ya Cameroon.

Makundi hayo yanatarajiwa kuwa na ushindani mkubwa kutokana na historia ya timu zilizopangwa pamoja, huku Simba na Yanga zikipata nafasi nyingine ya kukutana na wapinzani waliowahi kuwakwaza katika mashindano ya CAF.

Jumla ya timu 16 zitashiriki hatua hiyo, zikiwa zimegawanywa katika makundi manne yenye timu nne kila moja, ambapo timu mbili zitakazomaliza katika nafasi za juu kwenye kila kundi zitafuzu robo fainali.

Makundi ya Ligi ya Mabingwa Afrika 2026/2027

Haya hapa makundi yote manne yaliyopangwa katika droo ya Ligi ya Mabingwa Afrika kwa msimu wa 2026/2027.

Kundi A

• Esperance de Tunis – Tunisia
• Petro Atletico – Angola
• FC Nouadhibou – Mauritania
• Wiliete SC – Angola

Kundi B

• Zamalek SC – Misri
• Young Africans (Yanga) – Tanzania
• MC Alger – Algeria
• Club Africain – Tunisia

Kundi C

• RS Berkane – Morocco
• Simba SC – Tanzania
• Orlando Pirates – Afrika Kusini
• Colombe Sportive – Cameroon

Kundi D

• Pyramids FC – Misri
• Al Hilal – Sudan
• Horoya AC – Guinea
• MAS de Fès – Morocco

Yanga yakutana tena na Zamalek, MC Alger

Kwa upande wa Yanga, Kundi B lina wapinzani ambao Wanajangwani wanafahamiana nao kutokana na kukutana katika mashindano mbalimbali ya Afrika.

Zamalek, ambayo imetwaa ubingwa wa Afrika mara tano, ni miongoni mwa timu zinazotarajiwa kutoa ushindani mkubwa katika kundi hilo.

Yanga ilikutana na Zamalek mwaka 2000 katika raundi ya kwanza ya Kombe la Washindi Afrika, ambapo iliondolewa kwa jumla ya mabao 5-1.

Timu hizo zilikutana tena mwaka 2012 katika raundi ya awali ya Ligi ya Mabingwa Afrika, safari hii Yanga ikitolewa kwa jumla ya mabao 2-1.

Mbali na Zamalek, Yanga ina kumbukumbu nyingine dhidi ya MC Alger ambayo ilikutana nayo katika hatua ya makundi msimu wa 2024/2025.

Katika msimu huo, Yanga ilitoka sare ya bila kufungana dhidi ya MC Alger jijini Dar es Salaam, kabla ya kupoteza kwa mabao 2-0 katika mchezo wa ugenini nchini Algeria.

Matokeo hayo yaliipa MC Alger nafasi ya kumaliza juu ya Yanga kwenye msimamo wa kundi na kufuzu robo fainali.

Hata hivyo, si kila mpinzani wa Kundi B mwenye kumbukumbu nzuri dhidi ya Yanga.

Club Africain ya Tunisia iliondolewa na Yanga katika hatua ya mchujo ya Kombe la Shirikisho Afrika msimu wa 2022/2023, baada ya timu hizo kutoka sare ya bao 1-1 Dar es Salaam na Yanga kushinda bao 1-0 ugenini.

Kwa rekodi hizo, Yanga inaingia kwenye kundi lenye wapinzani wanaoifahamu vizuri, jambo linaloongeza ushindani katika harakati za kutafuta tiketi ya robo fainali.

Simba, RS Berkane na Orlando Pirates tena

Kwa Simba, droo hiyo imewakutanisha Wekundu wa Msimbazi na timu mbili ambazo zimewahi kuwaondoa katika mashindano ya Kombe la Shirikisho Afrika.

RS Berkane ndiyo iliyowazuia Simba kutwaa ubingwa wa Kombe la Shirikisho Afrika msimu wa 2024/2025, baada ya kuifunga kwa jumla ya mabao 3-1 katika mechi mbili za fainali.

Katika mchezo wa kwanza uliochezwa Morocco, Simba ilifungwa mabao 2-0 kabla ya timu hizo kutoka sare ya bao 1-1 katika mchezo wa marudiano uliofanyika Zanzibar.

Hivyo, kukutana kwao tena katika Kundi C kunatoa nafasi kwa Simba kutafuta matokeo tofauti dhidi ya timu hiyo ya Morocco.

Upande wa Orlando Pirates, timu hizo zilikutana katika robo fainali ya Kombe la Shirikisho Afrika msimu wa 2021/2022.

Simba ilishinda bao 1-0 katika mchezo wa kwanza uliochezwa nyumbani, lakini ikapoteza kwa idadi hiyo hiyo ugenini, kabla ya Orlando Pirates kusonga mbele kwa ushindi wa penalti 4-3.

Mpinzani mwingine wa Simba ni Colombe Sportive ya Cameroon, ambayo imefuzu hatua ya makundi baada ya kuiondoa Teungueth FC ya Senegal kwa jumla ya mabao 3-0.

Ingawa Colombe haina historia kubwa katika hatua hiyo kama baadhi ya wapinzani wake, Simba itahitaji kuwa makini ili kuepuka kupoteza pointi muhimu katika kundi lenye ushindani.

Ratiba ya Ligi ya Mabingwa Afrika 2026/2027

Shirikisho la Soka Afrika (CAF) limethibitisha kuwa mechi za hatua ya makundi ya Ligi ya Mabingwa Afrika msimu wa 2026/2027 zitaanza Novemba 27, 2026 na kumalizika Januari 24, 2027.

Hatua hiyo itakuwa na raundi sita za mechi, huku kila timu ikicheza michezo mitatu nyumbani na mitatu ugenini.

Ratiba ya tarehe za hatua ya makundi ni kama ifuatavyo:

Baada ya kukamilika kwa hatua ya makundi, timu nane zitakazofuzu zitaingia robo fainali, ambayo michezo yake ya kwanza imepangwa kufanyika Februari 26–28, 2027.

Mechi za marudiano za robo fainali zitachezwa Machi 5–7, 2027, kabla ya mashindano kuendelea na nusu fainali mwezi Aprili.

Simba, Yanga zinaingia makundi zikiwa na rekodi nzuri

Licha ya ugumu wa makundi waliyopangiwa, Simba na Yanga zimefika hatua hiyo baada ya kuonyesha uwezo mzuri katika mechi za awali.

Simba imefuzu ikiwa imefunga jumla ya mabao 16 katika michezo minne ya raundi mbili za awali.

Wekundu hao walianza kwa kuiondoa Mighty Wanderers ya Malawi kwa jumla ya mabao 7-1, kabla ya kuichapa 15 de Agosto ya Guinea ya Ikweta kwa jumla ya mabao 9-1.

Yanga nayo imefuzu ikiwa imefunga mabao 11, baada ya kuiondoa Gaborone United ya Botswana kwa jumla ya mabao 3-2 katika raundi ya kwanza.

Katika raundi iliyofuata, Wanajangwani waliiondoa CFFA ya Madagascar kwa jumla ya mabao 8-1 na kujihakikishia nafasi ya hatua ya makundi kwa msimu wa nne mfululizo.

Hata hivyo, hatua ya makundi inatarajiwa kuwa na ushindani tofauti na raundi za awali, kutokana na kukutana kwa timu zenye uzoefu mkubwa wa mashindano ya Afrika.

Bingwa wa Ligi ya Mabingwa Afrika 2026/2027 kupata Dola milioni 6

Mbali na ushindani wa kusaka ubingwa, CAF imethibitisha kuwa mshindi wa Ligi ya Mabingwa Afrika msimu wa 2026/2027 atapata zawadi ya Dola za Marekani milioni 6.

Kiasi hicho ni sehemu ya uwekezaji wa CAF katika mashindano ya klabu barani Afrika, huku bingwa wa Kombe la Shirikisho Afrika akitarajiwa kupata Dola milioni 4.

Pia, matumizi ya teknolojia ya usaidizi waamuzi kwa njia ya video (VAR) yamepangwa katika hatua ya makundi ya mashindano hayo.

Mapendekezo ya Mhariri:

1. CFFA vs Yanga Leo 17/10/2026 Saa Ngapi?
2. Hiki Apa Kikosi Cha Yanga Vs CFFA Leo 17/10/2026
3. Hiki Apa Kikosi cha Yanga vs Simba Leo 10/10/2026, Mngqithi Ataja Wachezaji 11 wa Kuanza