Harry Kane Aifikia Rekodi ya Cristiano Ronaldo Ligi ya Mabingwa Ulaya
Harry Kane Aifikia Rekodi ya Cristiano Ronaldo Ligi ya Mabingwa Ulaya baada ya kufunga katika mechi sita mfululizo za hatua ya mtoano.
Mshambuliaji huyo wa Bayern Munich na England alifunga dakika ya 94 katika sare ya 1-1 dhidi ya Paris Saint-Germain kwenye Uwanja wa Allianz Arena. Hata hivyo, bao hilo halikutosha kuiokoa Bayern, ambayo ilitolewa kwa jumla ya mabao 6-5.
Kane sasa amekuwa mchezaji wa pili pekee katika historia kufunga katika mechi sita mfululizo za hatua ya mtoano ya Ligi ya Mabingwa Ulaya. Rekodi hiyo iliwekwa na Cristiano Ronaldo kati ya mwaka 2012 na 2013.
Katika mechi ya mkondo wa kwanza, Kane pia alifunga penalti kwenye kipigo cha mabao 5-4 dhidi ya PSG. Licha ya juhudi zake, Bayern iliaga mashindano na PSG kusonga mbele hadi fainali, ambako watacheza dhidi ya Arsenal.
Kane alijiunga na Bayern akitokea Tottenham Hotspur akiwa na lengo la kutwaa mataji makubwa ya Ulaya. Hata hivyo, safari yake ya kutafuta taji la Ligi ya Mabingwa Ulaya imeendelea kuwa ngumu.
Mshambuliaji huyo amekuwa na msimu bora binafsi, akiwa amefunga mabao 56 katika mechi 49. Hata hivyo, atalazimika kusubiri takribani miezi tisa kabla ya kuanza tena safari ya kuwania medali ya ubingwa wa mashindano hayo.
Kwa sasa, Bayern tayari wameshatangazwa kuwa mabingwa wa Bundesliga, huku wakiwa wamebakiwa na mechi mbili mkononi. Pia wapo katika fainali ya DFB-Pokal, ambako watacheza dhidi ya Stuttgart Mei 23.
Mapendekezo ya Mhariri:
