Rekodi Zinavyoibeba Simba Dhidi ya Azam FC Fainali ya Kombe la CRDB

Rekodi Zinavyoibeba Simba Dhidi ya Azam FC Fainali ya Kombe la CRDB

Macho na masikio ya wapenzi wa soka nchini leo Julai 4, 2026, yanaelekezwa Uwanja wa Gombani kisiwani Pemba, ambako Simba dhidi ya Azam FC watakutana katika fainali ya Kombe la Shirikisho la CRDB saa 11:00 jioni.

Pambano hili lina uzito wake kutokana na safari ya timu zote mbili hadi fainali, lakini pia rekodi za nyuma zinazoiweka Simba kwenye nafasi ya kuingia uwanjani ikiwa na kumbukumbu nzuri zaidi kwenye michuano hii.

Azam FC imeingia fainali kwa kishindo baada ya kuwatoa mabingwa watetezi Yanga kwa ushindi wa mabao 3-2, Juni 21, 2026. Kwa upande wa Simba, Wekundu hao wa Msimbazi walikata tiketi ya fainali baada ya ushindi wa mabao 4-0 dhidi ya Coastal Union.

Simba Inasaka Kuendeleza Rekodi ya Fainali

Tangu michuano hii iliporejea msimu wa 2015-2016, Simba imeingia fainali mara tatu na kila ilipofika hatua hiyo imetwaa taji.

Fainali ya kwanza kwa Simba ilikuwa msimu wa 2016-2017, ilipoifunga Mbao FC ya Mwanza mabao 2-1 kwenye Uwanja wa Jamhuri jijini Dodoma, Mei 28, 2017. Mchezo huo ulihitaji dakika 30 za nyongeza baada ya dakika 90 kumalizika kwa suluhu.

Simba ilitangulia kupata bao kupitia Frederick Blagnon, kabla ya Robert Ndaki kuisawazishia Mbao FC. Penalti ya Shiza Kichuya mwishoni ndiyo iliyoipa Simba ubingwa, huku uamuzi huo ukiibua malalamiko kutoka kwa viongozi na wachezaji wa Mbao FC.

Msimu wa 2019-2020, Simba ilirudi tena fainali na kuifunga Namungo FC mabao 2-1 kwenye Uwanja wa Nelson Mandela mjini Sumbawanga, Agosti 2, 2020. Mabao ya Simba yalifungwa na Luis Miquissone dakika ya 27 na John Bocco dakika ya 39, huku Edward Manyama akiifungia Namungo bao la kufutia machozi dakika ya 56.

Fainali ya tatu kwa Simba ilikuwa msimu wa 2020-2021, ilipoifunga Yanga bao 1-0 kwenye Uwanja wa Lake Tanganyika mjini Kigoma, Julai 25, 2021. Bao pekee la mchezo huo lilifungwa na Taddeo Lwanga dakika ya 80.

Kwa maana hiyo, fainali ya leo ni ya nne kwa Simba katika Kombe la CRDB tangu michuano iliporejea, ikiwa na kumbukumbu ya kutwaa taji katika fainali zote tatu zilizopita.

Azam FC na Fainali ya Tano

Kwa Azam FC, fainali ya msimu huu wa 2025-2026 ni ya tano tangu michuano hii iliporejea. Hata hivyo, rekodi yake kwenye hatua ya mwisho haijawa nzuri kama ya Simba.

Azam FC imetwaa taji hilo mara moja kati ya fainali nne ilizocheza kabla ya leo. Taji lake lilikuja msimu wa 2018-2019, ilipoifunga Lipuli FC ya Iringa bao 1-0 kwenye Uwanja wa Ilulu, Lindi, Juni Mosi, 2019. Bao hilo lilifungwa na Obrey Chirwa dakika ya 64.

Katika fainali nyingine tatu, Azam FC ilipoteza dhidi ya Yanga. Msimu wa 2015-2016 ilifungwa mabao 3-1, Mei 25, 2016. Msimu wa 2022-2023 ilifungwa bao 1-0, Juni 12, 2023. Msimu wa 2023-2024, ilipoteza kwa penalti 6-5 baada ya suluhu ya dakika 120 kwenye Uwanja wa New Amaan Complex, Zanzibar, Juni 2, 2024.

Rekodi za Simba Dhidi ya Azam FC Kombe la CRDB

Mbali na ubora wa Simba kwenye fainali, rekodi za kukutana na Azam FC kwenye michuano hii pia zinaibeba Simba.

Kabla ya mechi ya leo, timu hizi zimekutana mara nne katika Kombe la CRDB. Simba imeshinda mara tatu, huku Azam FC ikishinda mara moja.

Mara ya kwanza zilikutana Aprili 29, 2017, kwenye nusu fainali iliyopigwa Uwanja wa Benjamin Mkapa. Simba ilishinda bao 1-0 kupitia Mohamed Ibrahim ‘MO’ dakika ya 48.

Julai 1, 2020, zilikutana tena hatua ya robo fainali kwenye Uwanja wa Benjamin Mkapa. Simba ilishinda mabao 2-0, yaliyofungwa na John Bocco dakika ya 39 na Clatous Chota Chama dakika ya 56.

Mkutano wa tatu ulikuwa nusu fainali ya Kombe la CRDB, Juni 26, 2021, kwenye Uwanja wa Majimaji, Ruvuma. Simba ilishinda bao 1-0 kupitia Luis Miquissone dakika ya 89.

Azam FC ilipata ushindi wake wa kwanza dhidi ya Simba kwenye michuano hii Mei 7, 2023, katika nusu fainali iliyopigwa Uwanja wa Nangwanda Sijaona, Mtwara. Azam ilishinda mabao 2-1, mabao yake yakifungwa na Lusajo Mwaikenda dakika ya 22 na Prince Dube dakika ya 75. Bao la Simba lilifungwa na Sadio Kanoute dakika ya 28.

Azam FC Iliwatoa Mabingwa Watetezi

Azam FC imefika fainali baada ya kuwa na safari imara kuanzia hatua ya 64 bora. Ilianza kwa kuifunga Endument FC ya Kilimanjaro bao 1-0, kabla ya kuichapa Mbeya Kwanza 1-0 raundi ya 32.

Katika hatua ya 16 bora, Azam FC iliifunga Fountain Gate mabao 4-0. Robo fainali iliiondoa Mashujaa kwa ushindi wa bao 1-0, kabla ya kuhitimisha safari yake ya fainali kwa kuifunga Yanga mabao 3-2.

Ushindi huo dhidi ya Yanga ulikuwa mkubwa zaidi kwa sababu ulivunja rekodi ya mabingwa hao watetezi kucheza mechi 28 za Kombe la CRDB bila kupoteza. Mara ya mwisho Yanga kupoteza kwenye michuano hiyo kabla ya hapo ilikuwa Julai 25, 2021, ilipofungwa na Simba bao 1-0 kwenye fainali iliyopigwa Kigoma.

Rekodi hiyo ya Yanga ilidumu kwa siku 1,792, sawa na miaka minne, miezi 10 na siku 27.

Simba Ilivyofika Hatua ya Fainali

Simba nayo ilianza kampeni zake hatua ya 64 bora kwa ushindi wa mabao 3-0 dhidi ya Greenland FC ya Kagera. Raundi ya 32, iliifunga B19 FC mabao 2-0.

Katika hatua ya 16 bora, Simba iliichapa Dodoma Jiji mabao 3-1, kabla ya kuifunga TRA United mabao 4-0 kwenye robo fainali.

Hatua ya nusu fainali, Simba ilifuzu kwa kishindo baada ya kuifunga Coastal Union mabao 4-0, Juni 20, 2026, kwenye Uwanja wa Sheikh Amri Abeid, Arusha. Ushindi huo uliirudisha Simba kwenye fainali ya Kombe la CRDB kwa mara ya kwanza tangu msimu wa 2020-2021.

Dondoo Muhimu za Kombe la CRDB

Michuano hii iliasisiwa mwaka 1967 ikifahamika kama Kombe la FAT. Mara ya mwisho kuchezwa kwa jina hilo ilikuwa mwaka 2002, kabla ya kusimama kwa miaka 13 mfululizo.

Mwaka 2015, michuano hiyo ilirejeshwa na kuitwa Kombe la Shirikisho la Azam, kabla ya sasa kufahamika kama Kombe la CRDB.

Yanga inaongoza kwa mataji tisa tangu kuanzishwa kwa michuano hiyo mwaka 1967, huku Simba ikiwa nafasi ya pili ikiwa na mataji manne. Timu sita nje ya Simba na Yanga zimewahi kutwaa taji hilo tangu enzi za Kombe la FAT.

Abdul Suleiman ‘Sopu’ ndiye mchezaji pekee aliyewahi kufunga mabao matatu katika mechi ya fainali, akifanya hivyo dhidi ya Yanga msimu wa 2021-2022 akiwa na Coastal Union ya Tanga.

Nini Kinasubiriwa Pemba?

Fainali ya leo inazikutanisha timu mbili zenye sababu tofauti za kusaka taji. Simba inaingia ikibebwa na rekodi ya kutopoteza fainali ilizocheza tangu michuano iliporejea, pamoja na rekodi nzuri dhidi ya Azam FC kwenye Kombe la CRDB.

Azam FC kwa upande wake inaingia ikiwa imemtoa bingwa mtetezi Yanga na ikiwa na nafasi ya kuvunja rekodi inayowabeba Wekundu wa Msimbazi.

Kwa mashabiki, jibu la mwisho litapatikana Uwanja wa Gombani, Pemba, ambako Simba dhidi ya Azam FC wataamua hatima ya taji la Kombe la Shirikisho la CRDB msimu wa 2025-2026.

Soma Pia:

1. Orodha ya Mabingwa Ligi kuu Tanzania Bara
2. Mfungaji Bora Ligi Kuu ya NBC 2025/2026
3. Yanga Yatwaa Ubingwa wa Tano Mfululizo NBC Premier League 2025/26
4. Vinara wa Assist Ligi Kuu ya NBC 2025/2026
5. Hawa Apa Wafungaji Bora Ligi Kuu ya NBC 2025/2026