Ramovic Aelezea Sababu za Ikanga Kukosa Mchezo wa Kombe la Shirikisho
Kocha wa Yanga, Sead Ramovic, amefichua sababu zilizomzuia winga mpya wa timu hiyo, Jonathan Ikangalombo, maarufu kama ‘Ikanga Speed,’ kushiriki katika mchezo wa Kombe la Shirikisho dhidi ya Copco.
Katika mahojiano na Mwanaspoti, Ramovic alieleza kuwa winga huyo alikosa mchezo huo uliochezwa kwenye Uwanja wa KMC Complex, jijini Dar es Salaam, kutokana na matatizo ya kiafya yaliyomkumba ghafla.
Ramovic alibainisha kuwa Ikanga alikumbwa na homa kali kwa kipindi cha karibu wiki nzima kabla ya mechi hiyo, hali iliyomfanya asiwe tayari kushiriki. “Asingeweza kucheza kwa vile alipata homa kali karibu wiki nzima, na jana ndio ameanza kuwa sawa. Hakukuwa na ulazima wa kumlazimisha kucheza hii mechi dhidi ya Copco,” alisema Ramovic.
Hata hivyo, kocha huyo alitoa tumaini kwa mashabiki wa Yanga kwa kueleza kuwa hali ya Ikanga imeanza kuimarika, na kuna uwezekano mkubwa ataungana na wenzake kwenye mazoezi yaliyoanza leo Jumatatu.
“Tutamwona maendeleo yake zaidi Jumatatu tutakapoendelea na mazoezi. Hajafanya mazoezi sawasawa na timu nzima tangu alipojiunga, na sasa amekumbana na changamoto hii ya afya,” aliongeza Ramovic.
Ikanga Speed alisajiliwa na Yanga katika dirisha dogo la usajili akitokea klabu ya AS Vita ya DR Congo. Nyota huyo ndiye mchezaji pekee wa kigeni aliyeongezwa kwenye kikosi hicho msimu huu, akichukua nafasi ya rodwali mwenzake, Jean Baleke, ambaye mkataba wake ulisitishwa. Sambamba na usajili wake, Yanga pia ilimsajili beki Israel Mwenda kutoka Singida BS.
Ramovic alifafanua kuwa Ikanga bado anahitaji muda wa kuzoea mifumo na falsafa ya soka inayotumiwa na Yanga kabla ya kuonyesha uwezo wake kamili. “Kuna kazi tunatakiwa kuifanya kwake. Huyu ni mchezaji mpya aliyefika hapa wakati tulipokuwa kwenye mechi ngumu za Ligi ya Mabingwa Afrika. Tunataka kumuona jinsi anavyounganika na wenzake na kuwa tayari kwa aina ya soka tunalotaka hapa,” alisema Ramovic.
Mashabiki wa Yanga wana matumaini makubwa kwa Ikanga Speed, wakitarajia kuona kasi na uwezo wake vikiongeza nguvu katika safu ya ushambuliaji ya timu hiyo. Huku hali yake ya kiafya ikionekana kuimarika, kocha na benchi la ufundi wanachukua tahadhari kuhakikisha nyota huyo anarejea uwanjani akiwa na utimamu wa hali ya juu.
Mapendekezo ya Mhariri:
- Timu zilizofuzu 32 bora CRDB Bank Federation Cup 2024/2025
- Matokeo ya Yanga Vs Copco FC Leo 25/01/2025
- Msimamo Kundi la Simba Kombe la Shirikisho CAF 2024/2025
- Matokeo ya Simba SC vs CS Constantine Leo 19/01/2025
- Kikosi cha Simba SC vs CS Constantine Leo 19/01/2025
- Ligi 20 Bora Afrika 2025
- Yanga Wamejipanga Kupambana Kesho: Ramovic
- Kocha MC Alger Atamba Kupata Pointi 3 Dhidi ya Yanga Licha ya Joto Kali
- Ligi Kuu Bara Kurejea Februari kwa Moto! Simba na Yanga Kuanza na Viporo
