Ahoua Aipa Simba Pointi Tatu Muhimu Uwanja wa Jamhuri
Katika mchezo wa Ligi Kuu Tanzania Bara uliofanyika kwenye Uwanja wa Jamhuri jijini Dodoma, Simba SC ilifanikiwa kuchukua pointi tatu muhimu dhidi ya Dodoma Jiji FC. Ushindi huo ulitokana na goli la penalti lililofungwa na kiungo mshambuliaji, Jean Charles Ahoua, dakika ya 63, baada ya penalti ya utata iliyotokana na tukio la beki wa Simba, Mohamed Hussein ‘Tshabalala,’ kudaiwa kufanyiwa madhambi.
Penalti Ya Utata Iliyoamua Mchezo
Penalti hiyo ilitokana na tukio lililotokea ndani ya eneo la hatari ambapo mwamuzi wa mchezo, Omary Mdoe kutoka Tanga, aliamua kutoa penalti baada ya Salmin Hoza wa Dodoma Jiji kuonekana kumchezea faulo Mohamed Hussein.
Hata hivyo, marudio ya mchezo yaliyotolewa na Azam TV yalionyesha wazi kuwa Hoza aliucheza mpira kabla ya kumgusa Tshabalala, huku ikionekana kama mchezaji huyo wa Simba alianguka kimchezo na kujaribu kuonyesha maumivu yasiyo ya kweli. Licha ya utata huo, Ahoua aliweza kufunga penalti hiyo na kuipa Simba bao la pekee lililoamua mchezo, na hilo likawa bao lake la pili msimu huu.
Mabadiliko ya Kikosi cha Simba
Kocha wa Simba, Fadlu Davids, alifanya mabadiliko mawili muhimu kabla ya mchezo huo. Kwanza, alimuanza Kelvin Kijili kwenye nafasi ya beki wa kulia badala ya Shomari Kapombe, huku kiungo mshambuliaji Joshua Mutale akimpisha nafasi Steven Mukwala ili kusaidiana na Leonel Ateba. Licha ya mabadiliko hayo, safu ya ushambuliaji ya Simba haikuonyesha ufanisi wa kutosha, hivyo Davids alilazimika kufanya mabadiliko zaidi kipindi cha pili kwa kumtoa Mukwala na kumuingiza kiungo Awesu Awesu.
Changamoto ya Umaliziaji kwa Simba
Ingawa Simba ilitawala sehemu kubwa ya mchezo, changamoto kubwa ilikuwa kwenye umaliziaji. Wachezaji wa safu ya mbele kama Mukwala, Ateba, na Debora Mavambo walishindwa kutumia nafasi walizozipata kuifungia timu yao mabao zaidi.
Hali hiyo ilisababisha Simba kutegemea zaidi penalti ya Ahoua ili kuweza kupata ushindi. Dodoma Jiji, kwa upande wao, walicheza kwa umakini, huku mabeki wa kati Augustino Nsata na Joash Onyango wakipambana kwa bidii kuzuia mashambulizi ya Simba.
Ajibu Ashindwa Kumaliza Mchezo
Dodoma Jiji walipata pigo dakika ya 20 ya mchezo baada ya mchezaji wao muhimu, Ibrahim Ajibu, kupata majeraha na kushindwa kuendelea na mchezo. Nafasi yake ilichukuliwa na Paul Peter, lakini pengo lake lilionekana wazi kwani Paul hakuweza kutoa pasi za mwisho kama alivyofanya Ajibu, jambo ambalo lilidhoofisha mashambulizi ya Dodoma Jiji.
Rekodi ya Simba Dhidi ya Dodoma Jiji
Kwa upande wa historia, Dodoma Jiji hawajawahi kuifunga Simba tangu walipopanda Ligi Kuu msimu wa 2020/2021. Hadi sasa, timu hizo zimekutana mara tisa na Simba imeibuka na ushindi katika kila mechi. Katika michezo hiyo, Simba imefunga mabao 16, huku Dodoma Jiji wakifunga mabao mawili tu, yote yakifungwa na Cleophace Mkandala.
Mchezo wa mwisho kati ya timu hizo ulipigwa pia kwenye Uwanja wa Jamhuri, ambapo Simba ilishinda kwa bao 1-0, lililofungwa na Freddy Michael Kouablan. Ushindi wa jana unaendeleza rekodi hiyo, huku Simba ikifikisha ushindi wa nne mfululizo katika msimu huu wa Ligi Kuu.
Mapendekezo ya Mhariri:
