CRDB Yadhamini Imbeju Ndondo Cup 2026 kwa Sh Milioni 400, Bingwa Kubeba Sh Milioni 30

CRDB Yadhamini Imbeju Ndondo Cup 2026 kwa Sh Milioni 400, Bingwa Kubeba Sh Milioni 30

Imbeju Ndondo Cup 2026 imezinduliwa rasmi Juni 5, 2026 ikiwa imepata nguvu kubwa baada ya Benki ya CRDB kupitia taasisi yake ya CRDB Bank Foundation kutangaza udhamini wa Sh milioni 400 kwa ajili ya kuendesha mashindano hayo na kutoa zawadi kwa washindi.

Msimu wa mwaka huu umeelezwa kuwa zaidi ya mashindano ya mpira wa miguu, kwa kuwa umebeba ajenda ya kuwawezesha vijana kiuchumi na kijamii kupitia soka, elimu ya fedha, ujasiriamali, fursa za kidijitali na mbinu za kujenga maisha bora.

CRDB Foundation na Shadaka Sports Zaweka Msisitizo wa Maendeleo kwa Vijana

Uzinduzi wa Imbeju Ndondo Cup 2026 umefanyika kwa ushirikiano kati ya CRDB Bank Foundation na Shadaka Sports, huku ujumbe mkubwa ukiwa ni kutumia michezo kama daraja la maendeleo kwa vijana nchini.

Kupitia msimu huu, vijana watakaoshiriki watanufaika na programu mbalimbali nje ya uwanja, zikiwemo elimu ya fedha, mafunzo ya ujasiriamali, fursa za kidijitali, ubunifu na uelewa wa namna ya kutumia vipaji vyao kujenga maisha endelevu.

Waandaaji wamesema lengo si kutafuta vipaji vya mpira wa miguu pekee, bali pia kuwapa vijana ujuzi utakaowasaidia katika maisha yao ya baadaye.

Sh Milioni 400 Kutumika Kuendesha Mashindano na Zawadi

Akizungumza jijini Dar es Salaam, Mtendaji Mkuu wa CRDB Bank Foundation, TullyEsther Mwambapa, alisema zaidi ya Sh milioni 100 kati ya fedha hizo zitatumika kama zawadi kwa mabingwa, washindi wa pili pamoja na tuzo mbalimbali kwa wachezaji na mashabiki.

Tully alisema msimu huu una fursa nyingi kwa wadau wote watakaoshiriki mashindano hayo.

Alieleza kuwa mabingwa wa Imbeju Ndondo Cup 2026 watajinyakulia Sh milioni 30, huku washindi wa pili wakiondoka na Sh milioni 20.

Kwa mujibu wa Tully, timu zitakazoshiriki pia zitakuwa zikipata zawadi za fedha katika kila hatua zitakayofanikiwa kufuzu, huku kiasi husika kikitarajiwa kutangazwa baadaye.

Mgawanyo wa Zawadi za Imbeju Ndondo Cup 2026

Aidha, fedha za zawadi zitawekwa kwenye Akaunti za Imbeju za washindi husika, hatua ambayo waandaaji wameieleza kuwa sehemu ya kuwapa washindi nafasi ya kupanga matumizi na maendeleo yao.

“Fedha hizi zote zitawekwa kwenye Akaunti za Imbeju za washindi husika, jambo litakalowapa fursa zaidi za maendeleo na kuakisi kaulimbiu ya Imbeju Ndondo Cup 2026 ya ‘Jiongeze’,” alisema Tully.

Kaulimbiu ya ‘Jiongeze’ na Fursa Nje ya Uwanja

Tully alisema mashindano ya mwaka huu yameandaliwa kwa lengo la kutengeneza fursa kwa timu na wachezaji wa ngazi ya chini ili waanze safari ya kujikwamua kiuchumi kupitia vipaji vyao.

“Tunathamini sana ubora. Ndiyo maana tumeweka mkazo katika kuwazawadia wote watakaoonyesha kiwango bora, iwe ndani ya uwanja au jukwaani, kwa kutambua mashabiki na vikundi vya ushangiliaji vinavyofanya vizuri zaidi,” alisema.

Mbali na kushiriki kwenye soka, vijana watapatiwa mafunzo ya elimu ya fedha na kufunguliwa Akaunti za Imbeju zitakazowasaidia kusimamia mapato yanayotokana na vipaji vyao.

Pia watapatiwa mafunzo kuhusu uwekezaji, ujasiriamali, ubunifu na fursa mbalimbali zilizopo katika uchumi wa kisasa.

Mkazuzu: Mashindano Yamewasaidia Vijana Kupata Fursa Kubwa

Kwa upande wake, Mratibu wa mashindano hayo, Yahaya Mohamed Mkazuzu, alisema mashindano hayo tayari yamewasaidia vijana wengi kufikia mafanikio kupitia mchezo wa soka.

Mkazuzu aliwataja baadhi ya wachezaji waliopata fursa ya kuchezea klabu kubwa baada ya kuonekana kupitia mashindano hayo kuwa ni Idd Selemani Nado, Kelvin Sabato na Mashaka Pobga.

“Nawashukuru CRDB Foundation kupitia Imbeju kwa kudhamini mashindano ya mwaka huu ambayo sasa yanaingia msimu wake wa 13,” alisema Mkazuzu.

DRFA Yaahidi Kusimamia Mashindano kwa Uadilifu

Mwenyekiti wa Kamati ya Mashindano wa Chama cha Soka Mkoa wa Dar es Salaam (DRFA), Ramadhan Shauritanga, ameahidi kusimamia mashindano hayo kwa uadilifu mkubwa na kwa kuzingatia sheria na kanuni zote za mchezo wa soka.

Kauli hiyo imekuja wakati mashindano hayo yakiingia kwenye msimu mpya, huku msisitizo ukiwa kwenye ushindani wa haki, kuibua vipaji na kuongeza thamani kwa vijana na wadau wa soka la ngazi ya jamii.

Mapendekezo ya Mhariri:

1. Liverpool Yaachana na Arne Slot, Iraola Apewa Nafasi Kubwa Kumrithi
2. PSG Mabingwa Tena UEFA Champions League Baada ya Ushindi wa Penalti Dhidi ya Arsenal
3. Ratiba Ligi Kuu Bara 2026 Yawagawa Wadau Baada ya Msimu Kusogezwa Hadi Juni 30
4. Ratiba ya Kombe la Dunia 2026: Mechi Zote, Tarehe, Viwanja na Makundi
5. Yanga Yaiingilia Azam Dili la Winga Mkongo Henoc Molia