Yanga Wamejipanga Kupambana Kesho: Ramovic

Yanga Wamejipanga Kupambana Kesho: Ramovic

KOCHA Mkuu wa Klabu ya Yanga, Saed Ramovic, akizungumza kuhusu maandalizi kuelekea mchezo muhimu dhidi ya MC Alger kutoka Algeria, amesisitiza kuwa timu yake imejipanga vyema kuhakikisha inapata ushindi katika mchezo huo wa kesho ambao utafanyika kwenye Uwanja wa Benjamin Mkapa, jijini Dar es Salaam.

Akiongea kwa kujiamini, Ramovic alieleza kuwa ushindi katika mchezo huu ni muhimu sana, kwani kushindwa kutapata matokeo mazuri kutamaanisha mwisho wa safari yao katika michuano hiyo. “Mchezo utakuwa mgumu. Kesho tunapaswa kupambana na kuhakikisha tunafunga mabao kwa sababu tukipoteza, safari yetu itakuwa imeishia hapo,” alisema kwa msisitizo.

Morali ya wachezaji wa Yanga imeelezwa kuwa katika hali ya juu, jambo ambalo Ramovic anaamini ni kiashiria kizuri kuelekea mchezo huu wa kihistoria. Alitoa wito kwa mashabiki wa timu hiyo kujitokeza kwa wingi ili kuwapa wachezaji nguvu zaidi kwa kushangilia bila kuchoka. “Nawaomba mashabiki wetu waje kutusapoti kwa wingi. Hii ni mechi muhimu sana na msaada wao utaongeza ari kwa wachezaji wetu,” aliongeza Ramovic.

Kwa upande wa wachezaji, Dickson Job, aliyekuwa akizungumza kwa niaba ya wenzake, alithibitisha kuwa timu iko tayari kwa changamoto hiyo. Alisema kuwa kucheza katika uwanja wa nyumbani ni faida kubwa, lakini akasisitiza umuhimu wa mashabiki kushiriki kikamilifu kwa kushangilia bila kuchoka. “Tupo tayari kwa ajili ya mchezo huu. Tukiwa kwenye uwanja wetu wa nyumbani, tunaomba mashabiki waje kwa wingi kutushangilia. Bila wao, hatuwezi kufanya lolote,” alisema Job kwa matumaini makubwa.

Mashabiki wa soka wanatarajia mchezo wa kesho kuwa wenye ushindani mkubwa, huku Yanga ikihitaji ushindi wa lazima ili kusonga mbele kwenye hatua ya robo fainali ya michuano hiyo ya kimataifa. Maandalizi ya timu, ari ya wachezaji, na sapoti ya mashabiki vinatarajiwa kuwa nguzo muhimu katika kufanikisha ndoto za Yanga kwenye michuano hiyo.

Mapendekezo ya Mhariri:

1. Kocha MC Alger Atamba Kupata Pointi 3 Dhidi ya Yanga Licha ya Joto Kali
2. Ligi Kuu Bara Kurejea Februari kwa Moto! Simba na Yanga Kuanza na Viporo
3. Mtibwa Sugar Kuwakaribisha Azam FC Manungu kwa Mechi ya Kirafiki
4. Ligi Kuu Bara: JKT Tanzania Waitana Kambini, Kocha Apania Maboresho
5. Watano Waagwa Azam Fc
6. CV ya Jonathan Djogo Kapela: Winga Mpya wa Yanga SC