Ushindi wa 2-0 Dhidi ya Ethiopia Wafufua Matumaini ya AFCON Kwa Taifa Stars

Ushindi wa 2-0 Dhidi ya Ethiopia Wafufua Matumaini ya AFCON Kwa Taifa Stars

Magoli mawili yaliotiwa nyavuni na Simon Msuva na Zanzibar finnest Feisal Salum katika kipindi cha kwanza yameipa Taifa Stars ushindi wa 2-0 dhidi ya Ethiopia, mchezo uliochezwa jana Novemba 16, 2024 kwenye Uwanja wa Pentecost Martyrs, Kinshasa nchini DR Congo umeleta taswira mpya kabisa katika safari ya Stars kufuzu michuano ya AFCON 2025.

Ushindi huu unatoa matumaini mapya kwa timu ya taifa ya Tanzania ambayo inajiandaa kwa hatua muhimu za kuingia fainali za Kombe la Mataifa ya Afrika (AFCON) zitakazofanyika nchini Morocco.

Msuva na Feisal Salum Wakiongoza Taifa Stars

Katika mchezo huo, Simon Msuva alifungua ukurasa wa mabao katika dakika ya 15 kwa bao safi alilofunga baada ya kupokea pasi nzuri kutoka kwa Novatus Dismas. Bao hili lilikuwa la mapema na liliongeza morali kwa wachezaji wa Taifa Stars ambao walionekana kuwa na kasi na nidhamu katika kipindi cha kwanza. Mashambulizi ya haraka yaliwashtua wachezaji wa Ethiopia na kuwalazimisha kujilinda zaidi huku Stars ikichukua uongozi wa mapema.

Dakika 16 baadaye, Feisal Salum aliongeza bao la pili baada ya kufanya shambulizi la kuvutia na kuifungia Taifa Stars bao la pili katika dakika ya 31. Bao hili lilizidi kuongeza furaha kwa wachezaji na mashabiki wa Stars, kwani kilichofuatia ni kuwaona wakicheza kwa kujiamini na kuendelea kusonga mbele. Feisal, ambaye ni mchezaji mwenye kipaji cha hali ya juu, alionyesha ufanisi mkubwa katika mchezo huu na kuendelea kuonesha umuhimu wake katika safu ya ushambuliaji ya Taifa Stars.

Licha ya Ethiopia kufanya mabadiliko kadhaa katika kipindi cha pili, ambapo walijaribu kuboresha hali yao kwa kuongeza shambulizi, Taifa Stars ilionekana kuwa bora na ilijilinda vyema.

Wachezaji wa Taifa Stars walikuwa na mwelekeo mzuri katika kusimamia mchezo, wakicheza kwa umakini na kutumia nafasi walizozipata kwa ustadi mkubwa. Ethiopia ilishindwa kupenya ngome ya Taifa Stars na hivyo kushindwa kufunga bao lolote.

Kocha wa Taifa Stars, Hemed Suleiman ‘Morocco’, alieleza furaha yake baada ya ushindi huu akisema, “Wachezaji wameonyesha moyo wa ushindani mkubwa. Ushindi huu ni motisha nzuri kuelekea mchezo wetu wa mwisho.

Tutapambana kuhakikisha tunafanikisha ndoto ya Watanzania.” Kauli hii ya kocha inadhihirisha ni jinsi gani timu ya Taifa Stars inavyohitaji ushirikiano na ari ili kufuzu kwa michuano ya AFCON.

Ushindi huu umeifanya Taifa Stars kufikisha pointi saba, na kuishusha Guinea yenye pointi sita na kupanda hadi nafasi ya pili katika Kundi H. Guinea sasa itacheza baadaye dhidi ya DR Congo, ambayo tayari imefuzu kwa AFCON 2025.

Hii inamaanisha kuwa mchezo wa mwisho wa Taifa Stars dhidi ya Guinea, utakaochezwa Novemba 19, 2024 kwenye Uwanja wa Benjamin Mkapa, Dar es Salaam, utakuwa na umuhimu mkubwa sana.

Mashabiki wa soka nchini Tanzania sasa wanajua kuwa ushindi katika mchezo huo dhidi ya Guinea utawapa Taifa Stars nafasi ya kushiriki kwa mara ya nne katika fainali za AFCON. Mchezo huu wa hatua ya makundi ni muhimu sana, na wachezaji wanajiandaa kwa mchezo huo kwa moyo mkubwa, huku lengo kuu likiwa ni kuhakikisha kuwa Taifa Stars inafanikiwa kufuzu kwa michuano hii ya kimataifa.

Maendeleo ya Soka la Tanzania na Matumaini ya AFCON 2025

Kwa upande wa Ethiopia, kocha wao, Mesay Teferi, alikiri kuwa kikosi chake kilishindwa kuhimili kasi ya Taifa Stars katika kipindi cha kwanza. Hata hivyo, aliwapongeza wachezaji wake kwa kuonyesha juhudi kubwa hasa katika kipindi cha pili cha mchezo. “Tulijitahidi lakini hatukuweza kuhimili wimbi la kasi la Stars. Hata hivyo, nashukuru kwa juhudi za wachezaji wangu,” alisema Teferi.

Ushindi dhidi ya Guinea hautakuwa tu hatua ya kihistoria kwa Taifa Stars, bali pia utakuwa ishara ya maendeleo ya soka la Tanzania. Kama Taifa Stars itafanikiwa kufuzu, itakuwa ni hatua nyingine muhimu katika historia ya soka la Tanzania, ambayo ilishiriki AFCON kwa mara ya kwanza mwaka 1980, na baadaye tena mwaka 2019 na 2024. Aidha, mwaka 2027 Tanzania itakuwa na heshima ya kuwa mwenyeji wa michuano hii, sambamba na Kenya na Uganda.

Kwa sasa, mashabiki wa soka nchini Tanzania wanasubiri kwa hamu kuona kama ndoto ya kushiriki AFCON 2025 itatimia, huku kikosi cha Taifa Stars kikifanya kazi kwa bidii kuhakikisha kwamba wanaingia kwa mafanikio katika michuano hii mikubwa ya soka.

Mapendekezo ya Mhariri:

1. Timu Zilizofuzu AFCON 2025
2. Matokeo ya Ethiopia vs Taifa Stars Leo 16/11/2024
3. Msimamo wa Kundi la Tanzania Kufuzu AFCON 2025
4. Ramovic Aonya Wachezaji Yanga Kuhusu Ulevi na Party
5. Wasudan CAFCL Wakabidhishwa Kwenye Mikono ya Mwana Mfalme Dube
6. Ratiba ya Kombe la Shirikisho la CRDB 2024/2025
7. Kikosi cha Taifa Stars Kufuzu AFCON 2025
8. Kikosi cha Tanzania Vs Ethiopia 16/11/2024