Taifa Stars Kuiendea mechi Dhidi ya Ethiopia Kimkakati

Taifa Stars Kuiendea mechi Dhidi ya Ethiopia Kimkakati

Katika maandalizi ya kufuzu kwa fainali za Kombe la Mataifa ya Afrika (AFCON) 2025, timu ya taifa ya Tanzania, Taifa Stars, ipombioni kuingia uwanjani kwa mkakati maalum dhidi ya Ethiopia. Mechi hii muhimu itapigwa Jumamosi, na Taifa Stars inategemea kupata ushindi wa kuimarisha nafasi yake katika mbio za kufuzu AFCON, itakayofanyika Morocco mwakani.

Kaimu kocha mkuu wa Taifa Stars, Hemed Suleimani maarufu kama “Morocco,” ameeleza kuwa timu imepania kuhakikisha inapata matokeo chanya. Akizungumza kuhusu maandalizi, kocha huyo amesisitiza kuwa, “Kila mmoja wetu yupo tayari kwa changamoto nyingine. Tunatambua wapinzani wetu hawajapata matokeo mazuri, lakini tunacheza kwa tahadhari ili kuhakikisha ushindi.”

Kocha Morocco alifafanua kuwa ushindi dhidi ya Ethiopia utakuwa hatua muhimu, kwani nafasi ya Stars kufuzu AFCON inategemea sana matokeo ya mechi hii pamoja na ile ya mwisho dhidi ya Guinea. Lengo la Taifa Stars ni kujipatia alama tatu ambazo zitaiweka kwenye nafasi nzuri kuelekea mchezo wa mwisho.

Hemed Suleimani aliongeza kuwa, presha kubwa kwa sasa ipo kwa Stars na Guinea, huku DR Congo ikiwa tayari imefuzu na kushika nafasi ya juu kwenye kundi ‘H’. “Mchezo dhidi ya Ethiopia ni wa muhimu kwa sababu utatupa matumaini makubwa kabla ya kumalizia na Guinea jijini Dar es Salaam,” alisema kocha huyo.

Stars itashuka uwanjani katika uwanja wa des Martyrs nchini Congo, mchezo ambao unatarajiwa kuanza saa 1:00 usiku kwa saa za Afrika Mashariki. Mechi ya mwisho ya Stars dhidi ya Ethiopia ilimalizika kwa suluhu, lakini kocha Morocco anaamini kuwa mchezo huu ni fursa nzuri ya kuonyesha uwezo wa Stars, kwa kuwa wachezaji wake wako tayari na wamejipanga kimkakati kwa ajili ya ushindi.

Historia ya Ushiriki wa Taifa Stars Katika Michuano ya AFCON

Taifa Stars imewahi kushiriki fainali za AFCON mara tatu. Mara ya kwanza ilikuwa mwaka 1980 huko Nigeria, ikafuatiwa na mwaka 2019 nchini Misri chini ya kocha Emmanuel Amunike. Safari ya tatu ilikuwa katika AFCON ya 2024 iliyoandaliwa nchini Ivory Coast, ambapo Stars ilikuwa kwenye kundi ‘F’ pamoja na Morocco, Zambia, na Jamhuri ya Kidemokrasia ya Kongo (DRC). Hata hivyo, iliishia hatua ya makundi. Hivi sasa, Stars inalenga kurejea tena kwenye michuano hiyo mikubwa Afrika, na mkakati uliopo ni kujiimarisha zaidi.

Msimamo wa Kundi ‘H’ na Nafasi ya Taifa Stars

Katika kundi ‘H,’ DR Congo inashikilia nafasi ya kwanza na pointi 12 na tayari imefuzu, ikifuatiwa na Guinea yenye pointi 6. Taifa Stars ipo nafasi ya tatu ikiwa na pointi nne, huku Ethiopia ikiwa na pointi moja tu.

Ushindi katika mchezo dhidi ya Ethiopia utaiinua Stars na kuimarisha matumaini ya kufuzu AFCON 2025, hasa ikizingatiwa kuwa Guinea, ambayo inashikilia nafasi ya pili, pia inahitaji kushinda ili kudumisha nafasi yake.

Kwa kuzingatia mbinu za uchezaji, Taifa Stars inalenga kutumia udhaifu wa Ethiopia ili kuweza kutengeneza nafasi za mabao na kuimarisha safu yake ya ulinzi. Timu imejizatiti kuhakikisha inacheza kwa nidhamu ya hali ya juu na kuzingatia mbinu bora ambazo zitaiwezesha kuibuka na ushindi.

Mapendekezo ya Mhariri:

1. Simba yaahidi kuanza Mechi za Makundi Kombe la Shirikisho CAF kwa Kishindo
2. Mshambuliaji wa Kimataifa Saimon Msuva Ajiunga na Kambi ya Taifa Stars
3. Mtibwa Sugar Warejesha Uongozi wa Ligi ya Championship
4. Ligi Kuu Tanzania Bara Yafikisha Mabao 164 Raundi 11
5. Safari ya Taifa Stars Kufuzu Afcon 2025 Kuendelea Novemba 16
6. Matokeo ya Yanga Princess vs Simba Queens Sc Leo 13/11/2024
7. Yanga Princess vs Simba Queens Sc Leo 13/11/2024 Saa ngapi?