Simba Yaianza Robo Fainali Shirikisho CAF Kwa Kichapo Cha 2-0
Simba imeanza vibaya hatua ya robo fainali ya Kombe la Shirikisho Afrika baada ya kupoteza kwa mabao 2-0 dhidi ya Al Masry ya Misri. Mchezo huo wa mkondo wa kwanza ulipigwa kwenye Uwanja wa Suez, ambapo Wanamsimbazi sasa wanalazimika kusaka ushindi wa angalau mabao matatu katika mechi ya marudiano inayotarajiwa kuchezwa Aprili 9, 2025, Uwanja wa Benjamin Mkapa, Dar es Salaam.
Katika mchezo huo, Simba ilikosa umakini hasa katika dakika 20 za kwanza, jambo ambalo liligharimu matokeo yao. Al Masry walitumia udhaifu huo na kufanikiwa kupata bao la kwanza dakika ya 16 kupitia kwa kiungo mshambuliaji, Abderrahim Deghmoum, aliyefunga kwa shuti kali nje ya eneo la hatari baada ya kupokea pasi kutoka kwa Youssef Ismail Omar El Farouk El Gohary.
Kipa wa Simba, Moussa Camara, alijitahidi kuzuia mpira huo lakini haukuwa na mafanikio baada ya kudunda mbele yake na kujaa nyavuni.
Kwa ujumla, Al Masry walikuwa na mpango thabiti wa mchezo wakitumia mfumo wa 3-5-2, ambao uliwapa nguvu zaidi katika safu ya ushambuliaji. Walifanikiwa kuzuia Simba kucheza kwa uhuru na kuongeza shinikizo katika eneo la kati, hali iliyowafanya Wanamsimbazi kushindwa kuandaa mashambulizi yenye ufanisi.
Simba Yapoteza Nafasi Mbalimbali
Pamoja na kupoteza mchezo, Simba iliweza kutawala takwimu za mchezo kwa kiasi kikubwa. Wanamsimbazi walipiga mashuti 18 dhidi ya saba ya Al Masry na walimiliki mpira kwa asilimia 51 dhidi ya 49 za wapinzani wao. Hata hivyo, tatizo kubwa lilikuwa kushindwa kutumia nafasi walizotengeneza, jambo lililosababisha kutopachika bao lolote licha ya juhudi kubwa za wachezaji wao.
Katika kipindi cha pili, Simba iliongeza kasi ya mashambulizi lakini bado ilishindwa kumtungua kipa wa Al Masry. Badala yake, wenyeji walifunga bao la pili dakika ya 90+2 kupitia kwa mchezaji aliyeingia kipindi cha pili, John Okoye Ebuka. Bao hilo lilikuja wakati Simba wakijaribu kusawazisha, hali iliyowafanya kuwa katika hali ngumu zaidi kuelekea mechi ya marudiano.
Mikakati ya Simba kwa Marudiano
Baada ya kipigo hiki, mashabiki wa Simba wameonyesha matumaini kwamba timu yao itaweza kurekebisha makosa katika mechi ya marudiano jijini Dar es Salaam. Kauli mbiu ya “Kwa Mkapa Hatoki Mtu” imeanza kutawala mitandao ya kijamii huku mashabiki wakiamini kuwa nyumbani wataweza kurekebisha matokeo.
Simba italazimika kushinda kwa tofauti ya mabao matatu ili kufuzu moja kwa moja au kushinda kwa mabao mawili ili angalau kufikia mikwaju ya penalti. Ili kufanikisha hilo, timu inapaswa kuwa makini zaidi katika safu ya ulinzi na kuhakikisha wanatumia vyema nafasi watakazopata katika mechi hiyo muhimu.
Endapo Simba itaweza kufanikisha hilo, itaingia hatua ya nusu fainali ambapo itakutana na mshindi kati ya Zamalek ya Misri na Stellenbosch ya Afrika Kusini, ambao walitoka sare ya 0-0 katika mchezo wao wa kwanza.
Mapendekezo ya Mhariri:
