Simba SC Yajiandaa Vikali Kuisambaratisha Tabora United
Dar es Salaam, Tanzania – Kocha Mkuu wa Simba SC, Fadlu Davids, ameweka wazi kuwa japokuwa aliiongoza timu yake katika ushindi mnono wa mabao 6-0 dhidi ya Kilimanjaro Wonders katika Kombe la FA, akili yake ilikuwa imeelekezwa kwenye mchezo muhimu wa Ligi Kuu dhidi ya Tabora United. Mtanange huo unatarajiwa kupigwa Jumapili hii katika Uwanja wa Ali Hassan Mwinyi mkoani Tabora, na Simba SC inaingia uwanjani ikiwa na dhamira ya kupata ushindi na kuendeleza mbio zao za kuwania ubingwa.
Fadlu Davids alitumia mchezo dhidi ya Kilimanjaro Wonders kama fursa ya kuwapa nafasi wachezaji ambao hawajapata muda mwingi wa kucheza katika ligi kuu. Hii iliwapa fursa ya kuonyesha uwezo wao na kudhihirisha kwamba wanaweza kutegemewa wakati wowote watakapohitajika.
“Ilikuwa ni mechi muhimu kwa wachezaji wote kupata muda wa kucheza, hasa ambao hawakuwa wanapata nafasi,” alisema Fadlu. “Ni kweli kuna baadhi ya wachezaji hawakuwapo, Aishi Manula amepatwa na mafua, wengine walikuwapo, lakini ilibidi niwapumzishe kwa sababu tuna mchezo mgumu dhidi ya Tabora United.”
Kocha huyo raia wa Afrika Kusini aliongeza kuwa mchezo huo ulikuwa ni sehemu ya maandalizi yao kwa ajili ya mchezo dhidi ya Tabora United. Alitumia fursa hiyo kuangalia wachezaji ambao wamekuwa hawaanzi mara kwa mara ili kuona kama wanaweza kuongeza nguvu kwenye kikosi katika mechi zijazo.
“Tumeutumia kama mazoezi, tunaangalia wachezaji ambao wamekuwa na viwango vya kutosha kuweza kuongeza nguvu katika mchezo wetu huo muhimu wa Ligi Kuu, pale wanapohitajika kuingia uwanjani kwenda kufanya kile ambacho tumewatuma,” alisema Fadlu.
Fadlu alikiri kuwa kuna tofauti kubwa ya kiwango kati ya Simba na Kilimanjaro Wonders, lakini alibainisha kuwa ameona vipaji katika baadhi ya wachezaji wa Kilimanjaro Wonders.
Kwa upande wa Kilimanjaro Wonders, Kocha Msaidizi Wilbard Pacho alisema lengo lao lilikuwa ni kupata angalau bao moja la kufutia machozi, lakini ubora wa Simba uliwaadhibu.
“Tuliangalia ubora na udhaifu wa Simba, lakini tulikuja hapa angalau tupate bao moja au mawili, watufunge lakini mabao 3-1, 5-2, hatukutaka tutoke uwanjani bila bao la kufutia machozi, lakini ubora wa wachezaji wa Simba umetuadhibu,” alisema Pacho.
Pacho aliongeza kuwa wamejifunza mengi kutoka kwa mchezo huo na kwamba watarejea na mbinu mpya katika mechi zao zijazo.
Simba SC iliibuka na ushindi wa mabao 6-0, yakifungwa na Velentino Mashaka, Ladack Chasambi, Joshua Mutale, Steven Mukwala, Edwin Balua na moja la kujifunga wenyewe kupitia kwa Patrick Sebastian. Sasa mashabiki wa Simba wanasubiri kwa hamu kuona kama timu yao itaendeleza wimbi la ushindi dhidi ya Tabora United Jumapili hii.
Mapendekezo ya Mhariri:
- Makundi ya Fainali za Mataifa ya Afrika AFCON 2025
- Tanzania Yapangwa Kundi C AFCON 2025
- Kundi la Taifa Stars AFCON 2025
- Timu zilizofuzu 32 bora CRDB Bank Federation Cup 2024/2025
- Kundi la Stars AFCON 2025 Kufahamika Leo
- Ramovic Aelezea Sababu za Ikanga Kukosa Mchezo wa Kombe la Shirikisho
- Matokeo ya Yanga Vs Copco FC Leo 25/01/2025
- Lyanga Apania Kufanya Makubwa Mashujaa FC
- Ancelotti Kuondoka Real Madrid Mwisho wa Msimu 2024/2025
- Yanga Yapania Kurudi kwa Nguvu Ligi ya Mabingwa Msimu Ujao
- Kagera Sugar Yatangaza Kumsajili Feruzi Kutoka Simba
