Pamba Jiji FC Yafanya Vikao Vizito Baada ya Mwanzo Mbovu Ligi Kuu
Mwanza, Tanzania – Baada ya kuanza vibaya katika Ligi Kuu Tanzania Bara, Pamba Jiji FC imeamua kufanya mabadiliko makubwa ili kuboresha mwenendo wao. Hadi sasa, timu hii imeshindwa kupata ushindi katika michezo saba ya mwanzo, ikishika nafasi ya mwisho kwenye msimamo wa ligi na kuwa na pointi nne tu. Hali hii imewafanya viongozi na benchi la ufundi kuwa na vikao vya dharura kujadili changamoto zinazoikabili timu na kutafuta suluhisho la haraka.
Afisa Habari wa Pamba Jiji FC, Moses William, alieleza kuwa vikao hivi vinatoa fursa ya kufanya tathmini ya mwenendo wa timu na kuweka mikakati ya kuimarisha uwezo wa wachezaji. “Vikao hivi vimekuwa vyenye tija na manufaa kwa maslahi mapana ya timu. Haya matokeo yanatukumbusha kuwa sisi tupo wapi na tunatakiwa tufanye nini,” alisema William. Aliongeza kuwa ni muhimu kwa mashabiki kuelewa kuwa timu ina uwezo wa kuboreka licha ya kuanza vibaya, akisisitiza kuwa ubora wa wapinzani umekuwa changamoto kubwa.
Katika michezo saba iliyocheza, Pamba Jiji FC imetoka sare michezo minne na kupoteza mitatu. Kipigo cha mwisho kilikuwa ni cha mabao 4-0 kutoka kwa Yanga SC, mchezo ambao ulifanyika Oktoba 3, mwaka huu, kwenye Uwanja wa Azam Complex, Dar es Salaam. Kipigo hiki kimewaumiza mashabiki wa Pamba Jiji FC, ambao wanatarajia kuona maboresho makubwa katika matokeo ya timu.
Moses William pia alifafanua kuwa wachezaji wamesharejea mapumzikoni na sasa wanajiandaa kwa mchezo wao ujao dhidi ya Kagera Sugar, utakaochezwa Oktoba 21, mwaka huu, kwenye Uwanja wa CCM Kirumba, Mwanza.
“Nadhani baada ya vikao, mambo yataenda vizuri kama tulivyotarajia. Tunatarajia kuboresha matokeo yetu, hasa baada ya kucheza na timu ngumu kama Singida Black Stars na Yanga,” aliongeza William.
Mapendekezo ya Mhariri:
