Okwi Atangaza Kustaafu Soka La Kimataifa
Aliyekuwa nahodha wa Timu ya Taifa ya Uganda na mchezaji wa zamani wa Simba SC, Emmanuel Okwi, ametangaza rasmi kustaafu kuitumikia timu yake ya taifa akiwa na umri wa miaka 32.
Okwi alitoa tangazo hili kupitia ujumbe aliouchapisha kwenye ukurasa wake wa Instagram, akielezea safari yake ya soka la kimataifa na maamuzi yake ya kuachia nafasi kwa kizazi kipya cha wanasoka wa Uganda.
“Kuiwakilisha nchi yangu kwenye jukwaa la kimataifa imekuwa ndoto ya kutimia ambayo ilitimia. Kuvaa jezi ya Uganda Cranes kila mara kuliacha hisia maalum na unahodha wa timu yetu ilikuwa ni fursa na heshima kubwa,” alisema Okwi.
Katika ujumbe wake, Okwi alizungumzia pia mustakabali wa soka la Uganda, akieleza kuwa Afrika Mashariki itakuwa mwenyeji wa michuano mikubwa ikiwemo CHAN itakayofanyika Agosti mwaka huu na AFCON 2027.
“Enzi mpya ya kusisimua kwa kandanda ya Uganda inakuja ambapo Afrika Mashariki itaandaa CHAN baadaye Agosti hii na baadaye AFCON 2027 huku wanasoka wengi wachanga wakijitokeza,” aliongeza Okwi.
Akieleza sababu ya uamuzi wake wa kustaafu, Okwi alifafanua kuwa anataka kutoa nafasi kwa wachezaji chipukizi kuonesha vipaji vyao katika timu ya taifa.
“Ndio maana, baada ya kuenzi kumbukumbu zote hizo, naamini ni wakati wa mimi kustaafu na kuwatengenezea njia wachezaji wetu wachanga wenye vipaji,” aliandika Okwi.
Okwi pia alitumia nafasi hiyo kutoa shukrani zake kwa mashabiki wa Uganda Cranes, familia yake, makocha, na Shirikisho la Soka Uganda (FUFA) kwa msaada waliompa katika safari yake ya soka.
“Siku zote nitahifadhi moyoni mwangu upendo nilioonyeshwa na mashabiki wote na shukrani zangu za pekee ziende kwa familia yangu, Kocha Bobby Williamson ambaye aliniamini kwa mara ya kwanza, makocha wote waliofuata baada ya hapo ambao tuliunda nao kumbukumbu pamoja katika hali ngumu na mbaya na bila shaka uongozi wa Shirikisho la Vyama vya Soka Uganda (FUFA),” aliandika Okwi.
Uamuzi wa Okwi wa kustaafu soka la kimataifa ni hatua muhimu katika historia ya soka la Uganda, huku mashabiki na wadau wa soka wakimtakia kila la heri katika hatua yake mpya baada ya soka la kimataifa.
Mapendekezo ya Mhariri:
- Yanga Princess Yaibuka na Ushindi wa 1-0 Dhidi ya Simba Queens
- Yanga Rasmi Yapeleka Kesi CAS Kupinga Msimamo wa Bodi ya Ligi
- Rachid Taoussi Aanza Hesabu za Msimu Ujao
- Safari ya Serengeti Girls Kufuzu Kombe la Dunia Yafika Tamati
- Ratiba Raundi ya Tano (16 Bora) CRDB Bank Federation Cup 2024/2025
- Kikosi cha Taifa Star Kilichoitwa Kambini Kufuzu Kombe la Dunia
- Timu Zilizofuzu 16 Bora Kombe la Shirikisho la CRDB Federation Cup 2024/2025
