Mbeya City Day Rasmi Kufanyika Septemba 7
Mbeya, jiji linalojivunia utajiri wa tamaduni na historia ya michezo, linajiandaa kusherehekea tukio kubwa na la kipekee ambalo limepangwa kufanyika Septemba 7, 2024. Tukio hili ambalo limepewa jina la “Mbeya City Day,” litakuwa ni fursa ya kuwakutanisha mashabiki wa soka, wadau wa michezo, na wakazi wa Mbeya kwa ujumla katika tamasha la burudani, michezo, na uzinduzi rasmi wa kikosi cha Mbeya City kwa msimu wa 2024/2025. Katika tamasha hili wapenzi wa soka mkoani Mbeya watashuhudia utambulisho wa wachezaji wote wa Mbeya city fc.
Maandalizi na Ratiba ya Tamasha la Mbeya City Day
Kwa mujibu wa taarifa kutoka kwa uongozi wa Mbeya City, maandalizi ya Mbeya City Day yamefikia hatua ya mwisho. Tamasha hili ambalo awali lilipangwa kufanyika Agosti 17, kisha kusogezwa hadi Agosti 31, sasa limepangwa rasmi kufanyika Jumamosi, Septemba 7, 2024. Tukio hili linatarajiwa kufanyika katika Uwanja wa Sokoine, Mbeya, na litaambatana na shughuli mbalimbali za burudani kutoka kwa wasanii maarufu wa muziki na vichekesho, sambamba na mechi ya kirafiki na timu ya Ligi Kuu ya Zambia, Real Nakonde.
Mbeya City ambayo inaendelea na maandalizi yake huko Mwakaleli, Tukuyu, inatarajiwa kurejea jijini Mbeya muda mfupi kabla ya siku ya tukio. Tukio hili linatarajiwa kuwa la kipekee kwani ni mara ya kwanza kwa timu hii kusherehekea siku maalum huku ikiwa imejipanga kurejea katika Ligi Kuu Tanzania Bara baada ya kushuka daraja misimu miwili iliyopita.
Uzinduzi wa Kikosi na Jezi Mpya za Mbeya City 2024/2025
Mbeya City Day haitakuwa tu ni siku ya burudani, bali pia itakuwa ni siku ya kihistoria kwa timu hiyo. Katika tamasha hili, uongozi wa Mbeya City utazindua rasmi kikosi kipya cha timu hiyo kwa msimu wa 2024/2025 pamoja na benchi la ufundi. Aidha, jezi mpya za timu hiyo kwa msimu mpya zitazinduliwa rasmi mbele ya mashabiki wao wa nyumbani.
Mtendaji Mkuu wa Mbeya City, Ally Nnunduma, amethibitisha kuwa tamasha hili limeandaliwa kwa umakini mkubwa ili kuhakikisha linaacha alama katika historia ya michezo jijini Mbeya. “Tumekamilisha maandalizi yote muhimu, na tuna uhakika kuwa wakazi wa Mbeya na mashabiki wa soka watafurahia tukio hili la kipekee,” alisema Nnunduma.
Mapendekezo ya Mhariri:
