Historia Mpya Yaandikwa: Man City Yanyakua Taji la EPL kwa Mara ya 4 Mfululizo
Manchester City wameweka rekodi ya kipekee katika historia ya soka ya Uingereza kwa kunyakua ubingwa wa Ligi Kuu ya Uingereza (EPL) kwa mara ya nne mfululizo. Ushindi huu wa kihistoria ulipatikana baada ya kuwatandika West Ham United 3-1 katika mechi ya kusisimua iliyochezwa kwenye dimba la Etihad Stadium.
Man City Yanyakua Taji la EPL kwa Mara ya 4 Mfululizo
Baada ya ushindi wa magoli 3-1 dhidi ya West Ham Jumapili, Manchester City imeandika historia mpya kwa kuibuka bingwa wa kombe la ligi kuu Uingereza mara nne mfululizo, ubingwa wao wa sita katika misimu saba iliyopita. Mafanikio haya ya kipekee yanazidi kuimarisha utawala wao katika soka la Uingereza.
Wakati huo huo, Arsenal, licha ya kuonyesha kiwango bora tangu msimu wao usio na kifani uliojulikana kama “The Invincibles” mwaka 2003-04, wamemaliza msimu wa 2023/2024 kwa alama mbili nyuma ya Man City. The Gunners walipata ushindi wa 2-1 dhidi ya Everton Jumapili, lakini haukutosha kuwapiku mabingwa hao watetezi.
Mchezaji kinda mwenye kipaji cha hali ya juu, Phil Foden, aliwaweka City mbele kwa bao la mapema ndani ya sekunde 79 tu tangu kipyenga cha kuanza mchezo kilipopulizwa. Foden hakuishia hapo, bali aliongeza bao la pili dakika ya 18 na kuzidi kuwazamisha West Ham kwenye dimbwi la majonzi.
Licha ya Mohammed Kudus kufunga bao la kufutia machozi kwa West Ham kabla ya mapumziko, bao la Rodri katika dakika ya 60 liliwazima kabisa matumaini ya West Ham na kuthibitisha ubingwa wa kihistoria wa Man City.
Ushindi huu unaifanya Man City kuwa klabu ya kwanza nchini Uingereza kushinda mataji manne mfululizo ya ligi kuu tangu kuanzishwa kwa ligi ya soka nchini humo mwaka 1888. Mafanikio haya makubwa yanazidi kuimarisha utawala wa Man City chini ya kocha wao mahiri, Pep Guardiola, ambaye ameiongoza klabu hiyo kutwaa mataji sita ya EPL tangu alipoteuliwa kuwa kocha mkuu mwaka 2016.
Huku Man City wakisherehekea ubingwa wao, upande wa pili Arsenal walimaliza msimu kwa majonzi baada ya kumaliza katika nafasi ya pili kwa msimu wa pili mfululizo, licha ya ushindi wao wa 2-1 dhidi ya Everton. Matokeo haya yanamaanisha kuwa kocha Mikel Arteta wa Arsenal, ambaye aliwahi kuwa msaidizi wa Guardiola huko Man City, atalazimika kusubiri tena ili kuiondoa klabu yake ya zamani kwenye kiti cha ufalme wa soka la Uingereza.
Mbali na hayo, mchezo huu pia ulikuwa wa kihistoria kwa Jurgen Klopp, ambaye alikuwa akiongoza Liverpool kwa mara ya mwisho kabla ya kuondoka rasmi kwenye klabu hiyo.
Mapendekezo Ya Mhariri:
