Mambo 5 Yaliyojitokeza Yanga vs CBE Ethiopia
Baada ya mchezo wa kwanza wa mzunguko wa pili wa hatua za awali klabu bingwa Afrika kati ya Yanga SC na CBE SA ya Ethiopia, uliofanyika kwenye Uwanja wa Abebe Bikila, Addis Ababa, mashabiki na wadau mbalimbali wa soka walionamambo kadhaa muhimu. Hii ilikuwa ni mechi ya kuwania kufuzu hatua ya makundi ya Ligi ya Mabingwa Afrika, ambapo Yanga walipata ushindi wa bao 1-0.
Licha ya ushindi huo, wapenzi wa klabu hiyo walibaki na maswali kadhaa kutokana na kiwango cha timu yao. Hapa habariforum tutaangalia mambo matano muhimu yaliyojitokeza katika mchezo huo.
1. Rekodi Mpya kwa Yanga SC
Yanga SC iliweka rekodi mpya kwa mara ya kwanza kupata ushindi nchini Ethiopia baada ya kupita takribani miaka 55 bila ushindi kwenye ardhi hiyo. Ushindi wa bao 1-0, lililofungwa na mshambuliaji wa timu hiyo Prince Dube, ulikuwa ni wa kihistoria.
Kulingana na takwimu, Yanga imekuwa ikienda Ethiopia mara nne bila kupata ushindi, lakini ushindi huu unatoa matumaini mapya kwa klabu hiyo katika kampeni zake za michuano ya kimataifa.
2. Changamoto za Kutumia Nafasi za Kufunga
Licha ya ushindi, Yanga SC ilikosa nafasi nyingi za wazi za kufunga mabao. Mshambuliaji Prince Dube, ambaye ndiye aliyefunga bao pekee, alikosa nafasi tatu za wazi kabla ya kufanikiwa kufunga katika dakika za nyongeza kabla ya mapumziko (45+1).
Pia wachezaji kama Maxi Nzengeli, Stephane Aziz Ki, na Clatous Chama nao walikosa nafasi za kufunga. Hii ni changamoto ambayo kocha Miguel Gamondi atahitaji kuifanyia kazi kuelekea mechi ya marudiano, ili kuhakikisha timu inatumia nafasi vizuri.
3. Mbinu za Kiufundi za Kocha Gamondi
Kocha Miguel Gamondi ameendelea kuthibitisha kuwa ana uwezo wa kubadilisha mbinu kulingana na hali ya mchezo. Katika mechi hii, alibadilisha baadhi ya nafasi za wachezaji wake. Alimuweka benchi beki wa kulia, Yao Kouassi Attohoula, aliyekuwa anatoka kuuguza majeraha, na badala yake kumtumia Dickson Job.
Job, ambaye anaweza kucheza kama beki wa kati, alicheza upande wa kulia huku timu ikiendelea kutumia mabeki watatu nyuma. Mbinu hizi zilimpa uhuru Chadrack Boka kushiriki zaidi kwenye mashambulizi, mbinu iliyozaa matunda.
4. Kiwango Duni cha Wachezaji
Moja ya mambo yaliyowasikitisha mashabiki wa Yanga SC ni kiwango duni cha uchezaji kilichoonyeshwa na timu. Licha ya kuwa walipata ushindi, timu ilionekana haipo katika kiwango chake bora ambacho mashabiki wa Yanga wamekizoea kukiona.
Hii inahusishwa na wachezaji kutofanya maandalizi ya pamoja kwa muda mrefu. Wengi wa wachezaji walirudi timu moja kwa moja kutoka kwenye majukumu ya timu zao za taifa, huku muda wa kufanya mazoezi ya pamoja ukiwa ni mdogo sana kabla ya mchezo huu muhimu.
5. Ushindi wa Ulinzi Imara
Yanga SC imekuwa na ulinzi imara msimu huu, ambapo katika mechi zao sita za mashindano wameweza kushinda tano bila kuruhusu bao. Katika michuano ya Ligi ya Mabingwa Afrika pekee, Yanga imefunga mabao 11 katika mechi tatu na haijaruhusu bao hata moja. Ushindi wa 1-0 dhidi ya CBE uliendelea kuweka rekodi ya “clean sheet” ya tano kwa Yanga msimu huu. Hili ni jambo la kujivunia kwa timu na benchi la ufundi.
Hitimisho; Mechi kati ya Yanga SC na CBE SA ilikuwa na umuhimu mkubwa kwa timu zote, lakini ushindi wa Yanga umeweka rekodi mpya na kuonyesha kwamba kocha Gamondi ana mipango madhubuti ya kuipeleka timu kwenye mafanikio zaidi. Hata hivyo, timu inahitaji kuongeza umakini kwenye nafasi za kufunga ili kuhakikisha wanajipatia ushindi wa kishindo katika mechi za marudiano.
Huku mechi ya marudiano ikitarajiwa kufanyika Uwanja wa New Amaan Complex, Zanzibar, Wananchi wa Yanga wanatarajia kuona timu yao ikifuzu hatua ya makundi ya Ligi ya Mabingwa Afrika kwa mara nyingine tena, huku rekodi nzuri nyumbani dhidi ya timu za Ethiopia ikiendelea kuwa na uzito mkubwa.
Mapendekezo ya Mhariri:
