Kikosi cha Simba VS Bravos do Maquis Leo 12/01/2025

Kikosi cha Simba VS Bravos do Maquis Leo 12/01/2025 | Kikosi cha Simba leo Dhidi ya Bravos do Maquis CAF

Wekundu wa Msimbazi, Simba SC, leo saa 1:00 usiku watakuwa na kibarua kizito kusaka tiketi ya kufuzu hatua ya robo fainali ya michuano ya Kombe la Shirikisho barani Afrika. Mechi hii muhimu itapigwa katika Uwanja wa 11 de Novembro, Luanda, Angola, ambapo Simba watakutana na Bravos do Maquis katika raundi ya tano ya hatua ya makundi ya Kombe la Shirikisho la CAF. Ushindi au sare kwa Simba leo unatosha kuwahakikishia nafasi ya kusonga mbele kutoka Kundi A.

Simba na Bravos tayari zimekutana mara moja msimu huu katika mchezo wa kwanza uliochezwa Dar es Salaam, ambapo Simba walishinda 1-0 kwa penalti ya Jean Charles Ahoua dakika ya 27. Simba sasa wanashika nafasi ya pili kwenye kundi wakiwa na alama tisa, sawa na CS Constantine wanaoongoza kwa tofauti ya mabao. Kwa upande wa Bravos, wanashika nafasi ya tatu na alama sita, huku CS Sfaxien wakiwa hawana alama baada ya kupoteza michezo yote minne.

Kocha wa Simba, Fadlu Davids, amesisitiza kuwa mchezo wa leo una umuhimu mkubwa si kwa Simba pekee bali pia kwa wapinzani wao. Simba wanahitaji kuhakikisha wanapata matokeo mazuri ili kupunguza presha ya mechi yao ya mwisho dhidi ya Constantine Januari 19 jijini Dar es Salaam. Kwa mujibu wa Davids, kikosi cha Simba kimejiandaa vizuri licha ya changamoto za muda mfupi wa mapumziko kati ya mechi.

“Umuhimu wa mchezo huu ni mkubwa kwa timu yetu. Tumepata mapokezi mazuri Angola, hali ya hewa ni rafiki, na tunajua malengo yetu ni kupambana na kupata ushindi,” alisema Davids.

Simba imeonyesha uwezo mkubwa msimu huu, hasa katika kipindi cha kwanza cha mechi zao. Mabao sita kati ya nane waliyoifunga kutoka hatua ya mtoano hadi sasa yamepatikana kipindi cha kwanza.

Wachezaji wa eneo la kiungo, akiwemo Jean Charles Ahoua na Kibu Denis, wamekuwa chachu ya ushindi wa timu. Kikosi kilichoenda Angola kimejumuisha viungo 11 kati ya wachezaji 22, jambo linaloonyesha mkakati wa timu kutawala mchezo katikati ya uwanja.

Kwa upande wa Bravos, wanajivunia rekodi yao ya kutofungwa nyumbani msimu huu kwenye michuano ya CAF, wakiwa wameshinda mechi zote nane. Wachezaji wao hatari ni Jo Paciencia na Francisco Cabuema “Macaiabo,” ambao kila mmoja amefunga mabao matatu msimu huu. Timu hii pia inajulikana kwa kutumia vyema kipindi cha kwanza, ambapo mabao saba kati ya 12 waliyofunga msimu huu yametokana na dakika za mwanzo.