Kikao Cha Masaa Saba Man Utd Chamalizika Bila Taarifa ya Hatma ya Ten Hag

Kikao Cha Masaa Saba Man Utd Chamalizika Bila Taarifa ya Hatma ya Ten Hag

Manchester, Uingereza – Hatima ya kocha Erik ten Hag ndani ya klabu ya Manchester United bado ingali gizani baada ya kikao kirefu cha masaa saba cha viongozi wa klabu hiyo kukamilika bila kutolewa taarifa yoyote rasmi kumuhusu kocha huyo.

Mkutano huo, uliofanyika katika makao makuu ya INEOS, ulihudhuriwa na wamiliki wa klabu, Sir Jim Ratcliffe, pamoja na viongozi wengine wakuu akiwemo Mkurugenzi Mtendaji Omar Berrada, Mkurugenzi wa Michezo Dan Ashworth, na Mkurugenzi wa Ufundi Jason Wilcox.

Mkutano Ulihusu Nini?

Ingawa vyombo vya habari vilielekeza nguvu kubwa katika kujadili mustakabali wa Ten Hag, taarifa kutoka ndani ya klabu zinaonyesha kuwa mkutano huo ulikuwa wa kawaida na ulijadili masuala mbalimbali ikiwemo ukarabati wa uwanja wa Old Trafford, mikataba ya udhamini, na masuala ya kifedha.

Hata hivyo, ukimya wa klabu kuhusu hatma ya Ten Hag umeongeza sintofahamu miongoni mwa mashabiki na wachambuzi wa soka. Baadhi wanahisi kuwa urefu wa mkutano huo unaashiria majadiliano makali kuhusu mwenendo wa timu chini ya Ten Hag, hasa ikizingatiwa matokeo mabovu ya hivi karibuni.

Matokeo Mabovu Yazua Maswali

Manchester United imeshindwa kushinda mchezo wowote katika mechi tano zilizopita, ikiwa ni pamoja na sare ya bila kufungana dhidi ya Aston Villa mwishoni mwa wiki iliyopita. Matokeo haya yameibua shinikizo kubwa kwa Ten Hag, huku baadhi ya mashabiki wakitaka atimuliwe.

Je, Ten Hag Anabaki?

Kwa mujibu wa taarifa kutoka ndani ya klabu, hakuna uamuzi wowote uliochukuliwa kuhusu hatma ya Ten Hag. Hata hivyo, baadhi ya wachambuzi wanaamini kuwa kimya cha klabu kinaweza kuwa ni ishara mbaya kwa kocha huyo raia wa Uholanzi.

Kaveh Solhekol, mwandishi wa habari wa Sky Sports News, alisema: “Kwa sasa, kutokuwepo kwa taarifa yoyote ni habari njema kwa Ten Hag. Ikiwa uamuzi ungefanyika wa kumfuta kazi, vyombo vya habari visingekuwa vya kwanza kufahamishwa.”

Iwapo Ten Hag atafutwa kazi, taarifa zinaeleza kuwa msaidizi wake, Ruud van Nistelrooy, anaweza kukaimu nafasi hiyo huku klabu ikiendelea kutafuta kocha mpya. Van Nistelrooy, ambaye alijiunga na benchi la ufundi la United Julai mwaka huu, ana uzoefu wa ukocha akiwa amewahi kuinoa PSV Eindhoven.

Jina jingine linalotajwa ni Thomas Tuchel, ambaye aliwahi kuhojiwa na Mkurugenzi wa Ufundi Jason Wilcox kuhusu uwezekano wa kuchukua nafasi ya Ten Hag.

Wakati huu, mashabiki wa Manchester United wanasubiri kwa hamu taarifa rasmi kutoka kwa klabu kuhusu hatma ya kocha wao. Je, Ten Hag atapewa nafasi zaidi ya kuinusuru timu au atakuwa mhanga wa matokeo mabovu? Jibu la swali hili litapatikana katika siku zijazo.

Mapendekezo ya Mhariri:

1. Timu 5 Zinazopewa Nafasi Kubwa Kushindwa Klabu Bingwa Ulaya 2024/2025
2. Andres Iniesta Atundika Daluga Baada ya Miaka 22 Ndani ya Soka la Kulipwa
3. Taifa Stars Kusaka Ushindi Dhidi ya DRC Congo Oktoba 10
4. Coastal Union na Yanga Zakumbana na Rungu la TPLB Kisa Uchelewaji
5. Simba na Yanga Kukabiliana na Vigogo Michuano ya CAF Afrika
6. Ratiba ya Makundi Kombe la Shirikisho CAF 2024/2025