Gadiel Aanza Kazi Chippa United, Majogoro Kicheko

Gadiel Aanza Kazi Chippa United, Majogoro Kicheko

Bekii wa kushoto wa Tanzania, Gadiel Michael, ameanza rasmi kazi katika klabu ya Chippa United baada ya kusaini mkataba wa mwaka mmoja akitokea Cape Town Spurs ya Afrika Kusini.

Kujiunga kwake na Chippa United kumeleta furaha kubwa kwa mchezaji mwenzake, Baraka Majogoro, kiungo mkabaji wa klabu hiyo, ambaye anaamini kwamba ushirikiano wao utaimarisha utendaji wa timu na kuongeza ubora wa uchezaji.

Majogoro, akiongea na vyombo vya habari, alielezea furaha yake ya kuwa na mchezaji mwenzake kutoka Tanzania kwenye timu hiyo, akisema kuwa uwepo wa Gadiel unampa faraja na matumaini makubwa ya mafanikio ya timu.

“Nina furaha sana kuona Gadiel amejiunga na timu ninayoichezea. Ninamjua vizuri, nimecheza naye huko nyumbani na ninaamini tutasaidiana sana. Uzoefu wangu hapa utamsaidia kuzoea haraka mazingira ya timu na utamaduni wake, na kwa pamoja tutasaidia kuonyesha vipaji vya wachezaji wa Tanzania,” alisema Majogoro kwa matumaini makubwa.

Ushirikiano wa Wachezaji Watanzania Chippa United

Majogoro alisisitiza kuwa kuwasili kwa Gadiel katika Chippa United kutasaidia si tu timu yao, bali pia itakuwa ni fursa ya kuonyesha vipaji vya wachezaji wa Tanzania, akiamini kwamba inaweza kufungua milango kwa wachezaji wengine wa Kitanzania kujiunga na ligi za nje.

Aidha, Majogoro aliendelea kusema kuwa kuwasili kwa Gadiel kunamwongezea hamasa zaidi ya kupambana kwa ajili ya timu. Alifafanua kuwa Gadiel ana uwezo mkubwa kwenye nafasi ya ulinzi, akieleza jinsi ambavyo amemshuhudia akicheza katika Ligi Kuu Tanzania Bara akiwa na klabu kama Azam FC, Yanga SC, Simba SC na Singida Fountain Gate.

“Kitu kingine kinachonifurahisha ni kwamba Gadiel ni beki bora. Nilimwona akicheza kwa mafanikio huko Tanzania, na sasa tutaweza kushirikiana na kusaidiana vizuri zaidi hapa Afrika Kusini,” Majogoro aliongeza kwa msisitizo.

Historia Fupi ya Gadiel na Majogoro

Gadiel Michael ni beki mwenye uzoefu mkubwa katika soka la Tanzania, akiwa amecheza kwenye vilabu vikubwa kama Azam FC, Yanga SC, na Simba SC kabla ya kujiunga na Singida Fountain Gate.

Kutoka huko, alisaini na Cape Town Spurs ya Afrika Kusini kabla ya kujiunga na Chippa United. Kwa upande mwingine, Baraka Majogoro, ambaye alijiunga na Chippa United mapema, amewahi kucheza kwenye vilabu mbalimbali vya Ligi Kuu Tanzania kama KMC, Mtibwa Sugar, Polisi Tanzania, na Ndanda FC kabla ya kuhamia Afrika Kusini.

Watanzania Katika Ligi ya Afrika Kusini

Mbali na Gadiel na Majogoro, kuna Mtanzania mwingine, Abdi Banda, ambaye naye anacheza katika Ligi ya Afrika Kusini. Banda kwa sasa anakipiga na Baroka Swallows, na amewahi pia kuchezea vilabu vingine vya Afrika Kusini kama Highlands Park, TS Galaxy, Chippa United, na Richards Bay.

Kwa jumla, kuongezeka kwa wachezaji wa Kitanzania katika ligi ya Afrika Kusini kunaonyesha kuimarika kwa vipaji vya wanasoka wa Tanzania na kutoa matumaini ya kufungua milango kwa wachezaji wengine wa Kitanzania kujaribu bahati zao katika soka la kimataifa.

Mapendekezo ya Mhariri:

1. Azam FC Yaichapa KMC 4-0, Taoussi Aanza Kugawa Dozi
2. Wataalam wa Soka Wachambua Utofauti wa Dube na Baleke
3. Tanzania Ipo Nafasi ya Ngapi Viwango vya FIFA 2024
4. Viwango vya FIFA Afrika 2024 Timu za Taifa
5. Kikosi cha Al Ahli Tripoli Chawasili na Bodyguards Kibao Airport
6. Mtasingwa Afunguka Kwanini Aliitosa Yanga