Djuma Shabani atimkia Ufaransa
Beki wa zamani wa Yanga SC, Djuma Shabani, ambaye kwa sasa anakipiga Namungo FC, ameondoka Tanzania na kuelekea Ufaransa kwa shughuli maalum za kifamilia. Djuma, aliyewahi kucheza katika klabu kubwa ya AS Vita ya DR Congo kabla ya kujiunga na Yanga, alifafanua kuwa amepewa muda wa wiki moja na klabu yake kukamilisha mchakato wa uhamisho wa familia yake.
Hii inakuja baada ya timu ya Namungo kuanza msimu kwa changamoto kubwa, ikipoteza michezo miwili ya mwanzo wa Ligi Kuu dhidi ya Tabora United na Fountain Gate.
Historia ya Djuma Shabani
Djuma Shabani alijizolea umaarufu alipokuwa AS Vita, moja ya klabu kubwa zaidi Afrika ya Kati, kabla ya kujiunga na Yanga miaka mitatu iliyopita. Alipoondoka Yanga, alisaini mkataba na Namungo FC, ambako ameonyesha uwezo wake licha ya timu hiyo kupitia mwanzo mgumu wa msimu wa Ligi Kuu Tanzania Bara.
Katika mechi zake mbili za awali msimu huu, Namungo ilipoteza 2-1 dhidi ya Tabora United na 2-0 dhidi ya Fountain Gate, na Djuma alishiriki kikamilifu kwenye mechi zote hizo kama beki wa kuaminiwa. Hata hivyo, wakati timu ikijiandaa kwa mchezo wake ujao dhidi ya Dodoma Jiji, Djuma alisafiri kwenda Ufaransa kwa ruhusa maalum ya wiki moja.
Sababu za Safari ya Ufaransa
Djuma alieleza kuwa safari yake ya Ufaransa inalenga kukamilisha mchakato wa uhamisho wa familia yake kutoka DR Congo kwenda Ufaransa kwa makazi ya kudumu. Familia yake tayari inaishi Ufaransa, lakini vibali vya makazi vilihitaji kusasishwa, na Djuma aliitwa na mamlaka za Ufaransa kwa ajili ya kukamilisha taratibu hizo.
“Familia yangu iko Ufaransa, na nina wiki moja tu ya kumaliza mchakato huu. Nimetoa taarifa kwa klabu yangu, Namungo, na nitarudi Tanzania mapema kwa kuwa siyo jambo gumu kwetu Wakongo kuhamia Ufaransa, kutokana na ukaribu wa nchi hizo mbili katika masuala ya uhamisho,” alisema Djuma.
Aliongeza kuwa mchakato huo hautachukua muda mrefu kwani ni suala la taratibu tu za kawaida, na matarajio yake ni kurudi kuungana na wachezaji wenzake mara baada ya kumaliza kazi hiyo.
Mapendekezo ya Mhariri;
