Ahoua Aingilia Kati Vita ya Assist Ligi Kuu, Awaburuza Feitoto na Aziz Ki

Ahoua Aingilia Kati Vita ya Assist Ligi Kuu, Awaburuza Feitoto na Aziz Ki

Katika msimu wake wa kwanza akiwa na klabu ya Simba SC, Jean Charles Ahoua ameanza kuonyesha uwezo wa hali ya juu, akijitokeza kuwa tishio kwenye orodha ya wachezaji wanaotoa pasi za mwisho, maarufu kama ‘asisti’, kwenye Ligi Kuu Tanzania Bara.

Kiungo huyu mshambuliaji, raia wa Ivory Coast, ameweza kufanikisha kutoa ‘asisti’ nne katika michezo minne aliyocheza, jambo lililomweka mbele ya wachezaji wazoefu wa ligi kama Feisal Salum ‘Fei Toto’ wa Azam FC na Stephane Aziz Ki wa Yanga SC.

Mpaka sasa, Ahoua amecheza dakika 289 ndani ya michezo minne, akifunga mabao mawili na kutoa pasi nne za mabao. Kwa kiwango hiki, ameonyesha uwezo wa kuibadilisha Simba katika safu ya ushambuliaji.

Tarehe 25 Agosti, Simba ilipocheza dhidi ya Fountain Gate kwenye Uwanja wa KMC Complex, Ahoua alitoa pasi mbili za mabao kwa wachezaji Edwin Balua na Valentino Mashaka huku mwenyewe akifunga moja, Simba ikiibuka na ushindi wa mabao 4-0.

Siku chache kabla ya hapo, tarehe 18 Agosti, Ahoua alitoa pasi kwa Che Fondoh Malone wakati Simba ikiibuka na ushindi wa 3-0 dhidi ya Tabora United. Hata hivyo, pasi yake ya mwisho ilikuja tarehe 26 Septemba, ambapo aliisaidia Simba kushinda mabao 2-0 dhidi ya Azam FC, kwa kumtengenezea nafasi Leonel Ateba kufunga.

Wachezaji Wakongwa Waanza Kushindwa na Ahoua

Msimu uliopita, wachezaji kama Stephane Aziz Ki wa Yanga na Kipre Junior waliongoza orodha ya ‘asisti’, kila mmoja akitoa pasi nane.

Hata hivyo, Ahoua ameanza kuwatoa jasho wachezaji hao msimu huu. Feisal Salum ‘Fei Toto’ wa Azam SC anashika nafasi ya pili kwa sasa akiwa na ‘asisti’ tatu, huku akitoa pasi kwa wachezaji kama Lusajo Mwaikenda na Idd Nado, Azam ikishinda 4-0 dhidi ya KMC, pamoja na pasi nyingine kwa Nassor Saadun katika ushindi wa 1-0 dhidi ya Coastal Union.

Kwa upande wa Stephane Aziz Ki, nyota wa Yanga SC, hadi sasa ametoa ‘asisti’ mbili tu. Alitoa pasi kwa Clement Mzize katika ushindi wa 2-0 dhidi ya Kagera Sugar, na pasi nyingine kwa Ibrahim Hamad ‘Bacca’ katika ushindi wa 1-0 dhidi ya KenGold.

Mbio za ‘Asisti’ Zashika Kasi

Wachezaji wengine wenye pasi mbili za mabao ni Mohamed Hussein ‘Tshabalala’ wa Simba, Ande Kofi wa Singida Black Stars, Salum Kihimbwa wa Fountain Gate, na Joseph Mahundi wa Kagera Sugar. Vita ya nani atamaliza msimu huu akiwa kinara wa ‘asisti’ bado ni ngumu, lakini kwa kuzingatia kiwango alichoanza nacho Ahoua, ni wazi kwamba hatakuwa mgeni katika ushindani huo.

Mapendekezo ya Mhariri:

1. Yanga Yaanza Mkakati wa Kurejea Kileleni mwa Msimamo wa Ligi kuu
2. Ratiba ya Taifa Stars vs DR Congo Kufuzu AFCON 2025
3. Kikosi cha Taifa Stars Kilichoitwa Dhidi ya DR Congo Kufuzu AFCON 2025
4. Dodoma Jiji Fc vs Tabora United Leo 02/10/2024 Saa Ngapi?
5. Acheni Kulewa Sifa – Kocha Coastal Union Awachana Chipukizi
6. Bado Niponipo Sana tu- Jibu la Tshabalala Kuhusu Kustaafu
7. Kikosi cha Fountain Gate FC 2024/2025