Simba na Stellenbosch Kukipiga Zenji Nusu Fainali Kombe la Shirikisho CAF

Simba na Stellenbosch Kukipiga Zenji Nusu Fainali Kombe la Shirikisho CAF

Katika mabadiliko ya ghafla yaliyochochewa na changamoto za miundombinu ya Uwanja wa Benjamin Mkapa, mtanange wa kukatana shoka wa nusu fainali ya Kombe la Shirikisho la CAF kati ya wawakilishi pekee wa Tanzania, wekundu wa msimbazi Simba SC, na wakali wa Afrika Kusini, Stellenbosch FC, sasa umehamishiwa kwenye ardhi ya kihistoria ya Zanzibar.

Uamuzi huu, uliofuatia agizo la serikali la kusitisha shughuli za soka katika uwanja wa taifa wa Benjamin Mkapa uliopo jijini Dar es salaam kwa muda usiojulikana, umefungua ukurasa mpya katika safari ya Simba kwenye michuano hii ya kimataifa.

Badala ya kiwango kikubwa walichoonesha katika uwanja wa nyumbani jijini Dar es Salaam, Wekundu wa Msimbazi sasa watalazimika kutumia Uwanja wa New Amaan Complex uliopo Unguja kama uwanja wao wa nyumbani kwa mchezo huu muhimu wa mkondo wa kwanza.

Chanzo cha mabadiliko haya ni wazi: matukio ya hivi karibuni ya mvua kubwa iliyoathiri vibaya mfumo wa mifereji ya maji katika Uwanja wa Benjamin Mkapa wakati wa mchezo wa robo fainali dhidi ya Al Masry. Picha za wahudumu wakijaribu kukabiliana na maji yaliyotuama kwa kutumia magodoro zilionesha wazi uhitaji wa haraka wa ukarabati.

Serikali, kupitia Wizara ya michezo, ilichukua hatua madhubuti kwa kusitisha matukio yote ya soka uwanjani hapo, ikisisitiza umuhimu wa kuhakikisha miundombinu inakidhi viwango vya kimataifa. Hii iliwalazimu Simba kutafuta suluhu ya haraka kwa michezo yao ijayo.

Uwanja Mpya: New Amaan Complex Zanzibar

Katika hatua ya haraka na ya kimkakati, Simba SC kwa ushirikiano na Shirikisho la Soka Tanzania (TFF), walifanya tathmini ya viwanja mbalimbali na hatimaye kuchagua New Amaan Complex kuwa uwanja mbadala kwa ajili ya mechi yao ya nusu fainali. Uwanja huu uliopo mjini Unguja, Zanzibar, umefanyiwa ukarabati mkubwa na sasa unakidhi viwango vya CAF kwa ajili ya mashindano ya kimataifa.

Kwa mujibu wa taarifa za uhakika, viongozi wa Simba wakiongozwa na Abbas Ally pamoja na wawakilishi wa TFF, walifanya mazungumzo na Shirikisho la Soka Zanzibar (ZFF). Mazungumzo hayo yalijumuisha ukaguzi wa kiufundi na kiutawala wa uwanja, ambapo makubaliano rasmi yalifikiwa na CAF kuridhia mchezo huo kuchezwa Zanzibar.

Muda na Tarehe ya Mchezo wa Simba vs Stellenbosch

Mchezo huo wa kihistoria umepangwa kuchezwa Jumapili hii kuanzia saa 10:00 jioni kwenye dimba la New Amaan Complex. Ni mara chache sana kwa visiwa vya Zanzibar kuwa mwenyeji wa mechi ya hatua hii ya juu katika mashindano ya CAF, jambo linalozua msisimko mkubwa kwa mashabiki wa soka wa visiwani.

Stellenbosch Kufika Mapema Zanzibar

Wapinzani wa Simba kwenye nusu fainali, Stellenbosch FC kutoka Afrika Kusini, tayari wamejulishwa rasmi kuhusu mabadiliko hayo ya uwanja. Timu hiyo inatarajiwa kuwasili visiwani Zanzibar siku mbili kabla ya mchezo, ili kuwa na muda wa kuzoea hali ya hewa na mazingira ya uwanja mpya kabla ya mtanange huo mgumu.

Mapendekezo ya Mhariri:

1. Ratiba ya CRDB Federation Cup Fixtures 2024/2025
2. Vilabu Bora Afrika 2024/2025 (CAF Club Ranking)
3. Ratiba ya Nusu Fainali Klabu Bingwa Afrika CAF 2024/2025
4. Al Ahly Yashindwa Kutamba Mbele ya Pyramids Pungufu
5. Mpanzu na Kibu Wamtia Hofu Kocha wa Stellenbosch
6. Ratiba ya Simba Nusu Fainali Kombe la Shirikisho Afrika
7. Kikosi cha Yanga vs Azam Leo 10/04/2025