Shabani Pandu na Mudrik Abdi Gonda Mbiuoni Kujiunga Fountain Gate

Shabani Pandu na Mudrik Abdi Gonda Mbiuoni Kujiunga Fountain Gate

KLABU ya Fountain Gate iko mbioni kukamilisha uhamisho wa nyota wawili mahiri kutoka JKU ya Zanzibar: beki wa kati Shabani Pandu Hassan na mshambuliaji matata Mudrik Abdi Shehe ‘Gonda’. Hatua hii inalenga kuongeza nguvu katika kikosi cha timu hiyo kwa msimu unaoendelea wa Ligi Kuu Tanzania Bara.

Taarifa kutoka ndani ya klabu zinathibitisha kuwa mazungumzo baina ya pande zote mbili yamefikia hatua za mwisho, huku dirisha la usajili likitarajiwa kufunguliwa rasmi Desemba 15. Matarajio ni kwamba mchakato wa uhamisho huo utakamilika kwa wakati, na wachezaji hawa wapya watajiunga rasmi na kikosi cha Fountain Gate.

Kwa mujibu wa chanzo cha kuaminika ndani ya klabu, uhamisho wa Shabani Pandu na Mudrik Abdi ni sehemu ya mapendekezo ya benchi la ufundi, ambalo limebainisha hitaji la kuboresha baadhi ya maeneo muhimu kikosini. Eneo la ulinzi, ambalo limekuwa likikumbwa na changamoto msimu huu, ndilo linaloangaziwa zaidi.

Afisa Mtendaji Mkuu wa Fountain Gate, Kidawawa Tabitha, alikiri kuwa huu ni wakati mwafaka wa kufanya mabadiliko ya kikosi. Akizungumza kuhusu uhamisho huo, alisema, “Huu ni muda wa kujadili masuala ya usajili, na tutatoa taarifa rasmi mara baada ya taratibu kukamilika.”

Kwa sasa, Fountain Gate inashikilia nafasi ya saba kwenye msimamo wa Ligi Kuu Tanzania Bara ikiwa na alama 17 baada ya michezo 12. Timu hiyo imekuwa tishio katika safu ya ushambuliaji, ikiwa ya pili kwa kufunga mabao mengi (20) nyuma ya Simba yenye mabao 22. Hata hivyo, ufanisi wao umetiwa doa na udhaifu katika ulinzi, kwani wameruhusu mabao 21, idadi inayowafanya kuwa timu ya pili kwa kufungwa mabao mengi baada ya KenGold (22).

Kocha wa timu, Mohamed Muya, amesisitiza hitaji la kuimarisha safu ya ulinzi kama sehemu ya mipango yake ya kuboresha kikosi. Ujio wa Shabani Pandu, ambaye ni mlinzi mahiri, unatarajiwa kuleta uthabiti unaohitajika kwenye safu hiyo.

Mapendekezo ya Mhariri:

1. Simba Yachezea Chuma 2-1 Dhidi ya CS Constantine
2. Msimamo Kundi la Simba Kombe la Shirikisho CAF 2024/2025
3. Matokeo ya CS Constantine vs Simba Leo 08/12/2024
4. Kikosi cha Simba Vs CS Constantine Leo 08/12/2024
5. Ratiba ya Mechi za Leo 08 December 2024
6. Dodoma Jiji Yatolewa Kombe la Shirikisho na Leo Tena kwa Penalti
7. CS Constantine vs Simba Leo 08/12/2024 Saa Ngapi?