Mapambano Makali Yanaendelea Championship 2024/2025
KIVUMBI cha Ligi ya Championship kinaendelea kurindima kwa kasi, ambapo baada ya michezo mitatu kusakatwa leo, kesho michezo mingine mitatu itapigwa katika viwanja mbalimbali. Kila timu inapambana kufa na kupona kuhakikisha inajikusanyia alama tatu muhimu kwa ajili ya kuimarisha nafasi zao kwenye msimamo wa ligi, huku ushindani ukiendelea kuwa mkubwa na wa kusisimua.
Ratiba ya Michezo ya Kesho
Kesho, mashabiki watashuhudia mechi za kusisimua zikiendelea kwenye viwanja vitatu tofauti:
Geita Gold vs Green Warriors
Mchezo wa kwanza utaanza saa 8:00 mchana kwenye Uwanja wa Nyankumbu, Geita. Geita Gold, ambayo ilianza raundi hii kwa ushindi wa mabao 2-1 dhidi ya Cosmopolitan, itakuwa na lengo la kudumisha ushindi huo mbele ya Green Warriors, ambao walipoteza 2-0 kwa Polisi Tanzania katika mechi yao ya mwisho.
Mbuni vs Mtibwa Sugar
Saa 10:00 jioni, mashabiki wa soka watatazama Mbuni ikipambana na Mtibwa Sugar kwenye Uwanja wa Sheikh Amri Abeid, Arusha. Mbuni, ambayo ilichapwa mabao 4-1 na African Sports, itaingia uwanjani ikiwa na shinikizo kubwa la kusaka ushindi. Mtibwa Sugar, kwa upande mwingine, inakuja na kumbukumbu ya ushindi wa mabao 2-1 dhidi ya TMA.
Mbeya Kwanza vs Kiluvya United
Mchezo wa mwisho wa siku utapigwa kwenye Uwanja wa Nangwanda Sijaona, Mtwara, ambapo Mbeya Kwanza itakutana na Kiluvya United. Mbeya Kwanza, baada ya ushindi wa 2-1 dhidi ya Transit Camp, inatarajia kuendeleza wimbi hilo la ushindi dhidi ya Kiluvya United, ambayo bado inatafuta ushindi wake wa kwanza katika mechi 10 zilizopita.
Michezo ya Jumapili
Jumapili, mashabiki wa soka watapata burudani ya michezo miwili ya kuvutia:
Mbeya City vs Biashara United
Katika Uwanja wa Sokoine, Mbeya City, ambayo ilitoka sare ya mabao 3-3 dhidi ya Stand United, itaialika Biashara United. Biashara United, nayo, ilitoka sare ya 1-1 dhidi ya Songea United, ikitafuta ushindi wake wa kwanza katika raundi hii.
Stand United vs Songea United
Uwanja wa Kambarage, Shinyanga, utakuwa mwenyeji wa mchezo wa mwisho wa raundi hii. Stand United itapambana na Songea United, huku kila timu ikihitaji ushindi wa kuboresha nafasi zao kwenye msimamo wa ligi.
Ushindani Mkali na Matarajio ya Kupanda Daraja
Kocha wa Polisi Tanzania, Bernard Fabian, ameeleza kuwa ushindani wa Ligi ya Championship mwaka huu ni wa hali ya juu zaidi. Amesisitiza kuwa tofauti ya pointi kati ya timu za juu na za chini ni ndogo, hali inayoongeza ugumu wa kila mchezo.
“Kadri ligi inavyoendelea, kila timu inajitahidi kadri inavyoweza kuhakikisha haipotezi alama. Hadi sasa hakuna timu yenye uhakika wa kupanda daraja, jambo linalofanya kila mechi kuwa ya muhimu sana bila kujali inachezwa nyumbani au ugenini,” alisema Fabian.
Mapendekezo ya Mhariri:
