Tanzania Yapanda kwa kasi katika Viwango vya FIFA
Timu ya Taifa ya Tanzania, Taifa Stars, imepiga hatua kubwa kwa kupanda nafasi 6 kwenye viwango vya ubora wa soka duniani vilivyotolewa na FIFA, kutoka nafasi ya 112 hadi 106. Hatua hii imekuja baada ya matokeo mazuri dhidi ya Sudan na Guinea katika michezo ya kimataifa, ambayo imeimarisha sifa ya Tanzania kwenye soka la kimataifa. Wakati huo huo, majirani wa Tanzania wameonyesha mwenendo tofauti, Kenya imeshuka nafasi mbili hadi 108, Uganda imeteremka nafasi moja hadi 88, na Zambia imepanda kwa nafasi 7, kufikia 87.
Ushindi Muhimu Dhidi ya Sudan na Guinea
Safari ya kupanda viwango vya FIFA kwa Tanzania ilianza kupitia ushindi wa kimkakati dhidi ya Sudan na Guinea. Katika mchezo wa kufuzu CHAN, Taifa Stars ilikutana na Sudan na kupata sare ya jumla ya 1-1, kila timu ikishinda nyumbani kwa bao 1-0. Licha ya Stars kutolewa kupitia mikwaju ya penalti, FIFA huzingatia matokeo ya dakika 90 pekee, hatua iliyosaidia Tanzania kupata alama muhimu.
Mchezo wa pili dhidi ya Guinea uliimarisha zaidi nafasi ya Tanzania, ambapo Taifa Stars ilishinda kwa bao 1-0, ushindi uliowahakikishia tiketi ya kushiriki Fainali za Kombe la Mataifa ya Afrika (AFCON) 2025 zitakazofanyika Morocco. Matokeo haya yameiwezesha Tanzania kufika kiwango cha juu zaidi cha kuaminika kwa miaka ya hivi karibuni.
Rekodi za Majirani wa Tanzania
Majirani wa Tanzania walipata matokeo tofauti katika viwango hivi vya FIFA. Kenya, ambayo hapo awali ilikuwa nafasi ya 106, imeshuka hadi 108 baada ya kufeli kufuzu michuano ya AFCON 2025. Sare dhidi ya Namibia na Zimbabwe zilichangia kushindwa kwa Kenya.
Uganda, licha ya kufuzu AFCON, imeshuka kutoka nafasi ya 87 hadi 88 baada ya kupoteza moja kati ya michezo yao miwili ya mwisho dhidi ya Congo Brazaville na Afrika Kusini. Kwa upande mwingine, Zambia imepanda nafasi 7, kufikia nafasi ya 87, ikiwa ni moja ya mafanikio bora kwa ukanda wa Afrika Mashariki na Kusini.
Maendeleo ya Taifa Stars
Tanzania imeonyesha ubora wake si tu katika ligi za ndani bali pia katika mashindano ya kimataifa, hatua inayodhihirishwa na kupanda kwake kwa kasi kwenye viwango vya FIFA. Akizungumza kuhusu maendeleo haya, msemaji wa Shirikisho la Soka Tanzania (TFF), Clifford Ndimbo, alieleza kuwa juhudi za pamoja kati ya TFF na serikali zinalenga kuhakikisha Taifa Stars inafikia viwango vya juu zaidi.
“Ni hatua nzuri ambayo Tanzania inaendelea kuonyesha. Kwa miaka ya hivi karibuni, tumekuwa na mwelekeo wa kupanda zaidi kuliko kushuka. Mkazo mkubwa umewekwa kwenye kupata matokeo mazuri. Tunapanda sasa, lakini malengo yetu ni kufikia ranki za juu zaidi, kutoka hizi za namba tatu (106) hadi namba mbili (99 na kuendelea),” alisema Ndimbo.
Muonekano wa Viwango vya Dunia
Argentina imeendelea kuwa kinara wa viwango vya FIFA, ikifuatiwa na Ufaransa, Hispania, England, na Brazil. Licha ya ushindani mkubwa, mafanikio ya Tanzania yanaonyesha kuwa soka la nchi hiyo linaweza kufika viwango vya juu zaidi kimataifa.
Mapendekezo ya Mhariri:
